Sairang leh Kawnpui inkar kawng ngawrh lehzuala siam that hna thawh tum a nih avangin vawiin atanga Nilaini thleng (August 4-6, 2026) he kawngah lirthei eng chu mah tlan phal a ni dawn lo.
Inrinnia Home Minister K Sapdanga hova Sairang leh Kawnpui inkar kawng siam that hna endiknaa ruahmanna siam danin Thawhtanni atanga Nilaini inkarah ngawrh lehzuala kawng siam hna thawh tum a nih avangin lirthei eng chi mah tlan phal a ni dawn lo a, hetih chhung hian 407 chin hnuai lam tan tlang kawngah (Kawnpui-Serkhan-Durtlang road) tlan theih a ni ang.
He ni nga chhung hian PWD leh NHIDCL ten an tha zawng zawng hmangin kawng siam hna an thawk ang a. Lirthei tangkhang mekte chu Mizoram Police ruahmanna hnuaiah August 3 (Pathianni)-ah chhuahtir vek tur niin ke 14 nei (14-wheeler) chin chung lam erawh chu tlan phal a ni rih lo ang a, an bungraw phurh pawimawh leh hmanhmawhthlak chu truck tê zawka transit tur a hrilh an ni.
Lirthei chet vel dan hi Aizawl leh Kolasib Traffic Police ten an vil dawn a; MLA TBC Lalvenchhunga chu Single Point of Contact niin kawng siam hna hi a vil zui dawn bawk.
Kawnpui, Khamrang, Mualkhang leh Sairang YMA ten hnatlangin kawng siam hna hi an thawhpui dawn bawk.
Kawng thawm that hna hi NHIDCL hnuaiah BR Goyal Infrastructure ten thawkin Mizoram PWD chuan a tul apiangah khawl leh hmanruate nen an tanpui reng bawk a. PWD atangin Er. Eddie C.Zothansanga, Superintending Engineer, Highway Circle-I, Executive Engineer – 2, SDO leh JE ten a hmunah an riahchilh mek a ni.