Khawvela chawimawina ngaihhlut ber, Nobel Peace Prize dawng tura White House-in US President Donald Trump-a an rawt rin sawt mek laiin tun hnaia sumdawnna na taka hremna a pek, India chuan ngaihdan sawi tur a nei lo va, “White House-in a chhang thei zawk ang,” a ti.
Kar tina thuthar lakhawmtute a kawmna thinah MEA thupuangtu, Randhir Jaiswal-a chu White House-in buaina tam tak titawptu tia chawimawina dawng tura Trump-a an rawtna chungchanga India ngaihdan zawh a ni a, buaina a tihtawp zingah India leh Pakistan inbeihna pawh an sawi tel.
“Kha zawhna kha chu White House a zawh chi ber ang,” tiin Jaiswal-a chuan a chhang.
Zirtawpni chawhma khan White House Press Secretary Karoline Leavitt-i chuan Nobel Peace Prize dawng tur hian US president chu âwm a tih thu sawiin, ‘Thailand leh Cambodia, Israel leh Iran, Rwanda leh Democratic Republic of the Congo, India leh Pakistan, Serbia leh Kosovo leh Egypt leh Ethiopia inkara buainate a titawp’ niin a sawi.
White House hotu hian Trump-a hian president a nih tawh thla ruk chhungin thla tin buaina pakhat ching fel zel angin a sawi a. “Tun hma lamah pawh President Trump-a hi Nobel Peace Prize hlan phu a ni,” a ti.
New Delhi chuan India leh Pakistan inkara May thlaa indona kha Trump-a a inrawlh vanga tawp a ni lo tih a lo sawi fo tawh a, tun hnaiah sumdawnna thilah US-in chhiah sang laksak a tum bawk.
New Delhi-in a inrawlh lo nia an sawi lai hian Islamabad chuan inkahhai puanna tura a inrawlh avangin Trump-a hnenah lawm thu a sawi.
June thla khan Pakistan hian Trump-a chu 2026 Nobel Peace Prize dawng tura rawtin India-Pakistan buainaa ‘palai hna a thawhna leh mi a hruainaah a hlawhtling’ niin an sawi.
Hetih lai hian chawimawina dawngtu tur thlangtu, Norwegian Nobel Committee chuan Trump-a rawt a nih chungchangah hian engmah a la sawi lo.