Aizawl: Prime Minister Narendra Modi chuan India rama kuthnathawktute tuamhlawmna scheme pui ber, PM-KISAN Samman Nidhi hnuaia tanpuina, 20th Installment chu Varanasi, Uttar Pradesh atangin Direct Benefit Transfer kaltlangin a sem chhuak.
Inrinnia a sem chhuah hi India rama kuthnathawktu vaibelchhe 9.70 te hnenah, avaiin Rs vaibelchhe 20,500 sem chhuah a ni a, heng zingah hian Mizorama kuthnathawktu mi 1,31,238 te pawh telin, avaiin Rs 38,06,86,000 sem chhuah a ni. Hei hi kum 2025-26 Financial Year chhunga installment vawi 1-na a ni.
He hun hi Mizorama district hrang hranga District Agriculture Office leh Krishi Vigyan Kendra atangtein live telecast kaltlanga chhim a ni.
State Level programme chu KVK Aizawl, Selesih-ah hman niin, he hun hi Environment, Forest & Climate Change Minister Lalthansanga chuan khuallian niin a hmanpui a. Agriculture & Farmers Welfare Department Special Secretary Ramdinliani, R. Lalnunzira, Director leh official dangte an tel bakah KVK hotute, PM-KISAN hamthatna dawngtute leh FPO member thahnem tak an tel bawk a, PM-KISAN Utsav Diwas hman nghal a ni.
Lalthansanga chuan scheme-in a tum leh a beisei ang ngeia tangkai taka hmang turin hamthatna dawngtute a chah a. State sorkar flagship programme Hand Holding Scheme Phase-2 hnuaiah kut hnathawktute tan online application dil theih a nih thu a sawi bawk.
Kum 2019 atangin PM Kisan Scheme hi bultan niin, Mizoramah pawh Agriculture & Farmers’ Welfare Department hmalaknain kalpui chhunzawm zel a ni a. He scheme hnuaiah hian kuthnathawktute’n tanpuina kum khatah Rs 6,000 an dawng thin a, installment thumin Rs 2,000 zela pek chhuah thin a ni.
PM-KISAN Scheme-ah hian sorkar hnathawk emaw, pensioner awm lohna (Group D tiam lovin) kuthnathawk chhungkua atangin mi pakhat zel inziah luh theih a ni.