Lallianmawia Pachuau-in ‘Nghilh bik suh Rinpui’ tih hla a phuah chhan, ‘Rinpuii’ chu inrinni khan a thi.
H. Lalrinpuii, 61 w/o Upa T Lalmalsawma chu inrinni chhun dar 12:25 khan cancer avangin Kawrthah damdawi inah a thi a. A boral zan hian an chenna in, Thuampui veng, Zawlnuam-ah lumen niin, nimin (pathianni) chhun dar 12 khan vui a ni.
‘Nghilh bik suh Rinpui’ tih hla hi kum 1983-a Lallianmawia Pachuau-in a phuah a ni a. Khatih lai, innghirnghona leh inhuatna pawh awm lo va, Rinpuii nen an inthen ta thut mai kha a tuar thiam lo em em mai a. A ngaihtuah let thin a, na hi a ti em em mai a. Hla-ah a siam mawlh mawlh a ni ber mai.
‘Nghilh bik suh Rinpui’ tih hla pawh hi, ‘Keimah vang a ni’ tih te, ‘Ka thai Mampui’ tih hla te, ‘Dawt leng an sel’ tih leh ‘Mampui ngaithiam rawh’ tih hla te nen hla inunau vek a ni. Heng hla ho zingah rau rau chuan a upa ber kan ti thei awm e.
He hla mawi tak mai hi a phuahtu Lallianmawia Pachuau hian — Nemte’n ka chawi nang che — album-ah khan a dah a ni.
‘Nghilh bik suh Rinpui’ tih hla hi a phuahtu Lallianmawia Pachuau bakah, kum 13 kalta khan Lalruatfela Pachuau-in a lo sa tawh a, tun hnaiah Youth Icon H Lalrempuia leh Kim Kima te’n an cover tawh bawk.