Aizawl: Mizoramah vawk hri, African Swine Fever (ASF) leng avangin Rs vbc 982.16 hu vel chan a ni tawh.
Mizoram Larsap General Vijay Kumar Singh chuan nimin khan AH&Vety. Department Secretary Lalsangliana leh hotu dangte chu Raj Bhavan-ah a kawm a. An inkawmnaa Dr. Esther Lalzoliani, Dy. Director (DI&E)-in a tar lan danin, March 21, 2021 khan Lungsen khuaah Mizorama African Swine Fever (ASF) case hmasa ber report a ni a. August 3, 2025 thleng khan ASF avanga vawk thi zat 69,411 awmin, hrileng darh zel tur ven nana suat (culled) 52,194 a awm a. Chhungkua 11,424 te nghawngin, Rs vaibelchhe 982.16 hu vel chan tawh anga chhut a ni.
Sorkar laipui Assistant to State for Control of Animal Disease leh State sorkar kaltlangin vawk suat zangnadawmna Rs nuai 1,451.915 sem chhuah tawh a ni a, heng bakah hian Mizoram DM&R Department kaltlangin vawk thi zangnadawmna Rs nuai 477.08 pek chhuah a ni tawh bawk.
Kumin March atang khan sample 221 test niin, heng zinga 142 te chu ASF a ni tih PCR hmanga finfiah tawh a ni.
An inkawmnaah hian AH&Vety. department hotute chuan, Mizoram chu ASF in a chenchilh tlat tawh avangin khuahkhirh turin hridanna kalpui chu hmalak theihna awm chhun a nih thu te, tun dinhmunah India ramah ASF vaccine a awm loh avangin a siam chhuaktu Vietnam atanga lakluh dan a awm em tih ngaihtuah a tul thu leh, sorkar laipui atanga fund hmuh kawngah harsatna a awm avanga zangnadawmna duh anga pek theih a nih loh thu pawh larsap an hrilh a ni.