India rama motorsports thuneitu sang ber, Federation of Motor Sports Clubs of India (FMSCI)-in intlansiak a buatsaiha Mizo rider inlan pahnih – K. Lalnunsanga leh Daniel Lalhriatkima te chuan intlansiak tum thumah gold medal pahnih leh bronze pakhat an la.
Electric Veng, Aizawl tlangval, Nunsanga hian gold medal lain Daniel-a hian gold leh bronze medal pakhat ve ve a hlawh chhuak thung.
MiMSA rider pahnihte hi Inrinni leh Pathiannia Coimbatore, Tamil Nadu-a Kari Motor Speedway-a MRF MMSC FMSCI Indian National Motorcycle Racing Championship 2025-ah Mizoram aiawhin 130-165cc huanga Novice Class-ah an inlan a, an che tha hle.
A ni khatna, Inrinnia qualify an tlanah Nunsanga hi 10-naah tlan thlengin intlansiak tak taka 10-na atanga bul tan chu a hmasa berah thlengin gold medal a la.
Phulmawi tlangval, Daniel-a hi qualify an tlanah 11-naah thlengin 11-na atanga bul tanin pathumnaah thlengin bronze medal a dawng bawk.
A ni hnihnaah Nunsanga hian a hma nia Race One-a a dinhmun, a hmasa ber (pole position) atanga bultan lehin a bike-ah chian lohna a neih hlauh avangin a hma ni a phak ta lo va, 8-naah thlengin medal a la phak lo.
Daniel-a erawh a hma nia a dinhmun, 3-na atanga bultanin a tlan tha hle a. A hmasa berah thlengin gold medal a dawng ve ta thung a ni.
MiMSA-in an aiawha rider a tirh pahnihte hi Mizoram chhunga inelnaah pawh inum tawk leh inel tawk tak an ni a, ram pum huap inelnaah pawh an inchak chhawk zui zak zak a ni.
MiMSA hian Mizoram pawna Mizo tihmingthatu an rider pahnihte hi a chhuangin a lawmpui tak zet tih an sawi a, an kal zelna turah duhsakna a hlan a. Anmahni lo buaipuitu, Coimbatore Mizo Welfare chungah lawmthu a sawi bawk.