Aizawl: BJP Mizoram Vice President Vanupa Zathang chuan vawiin thlenga Mizoram châk lakna kawng pawimawh siam that tak tak a ni thei lo hian politics an khelh danah development politics leh mipui awlsamna atana hmalakna tak tak an thlen phal lohzia a tar lang chiang hle tih a sawi.
Nimin khan BJP Mizoram chuan an party pisaah chawlhkar thar inhlanna leh political session hun neiin Vanupa Zathang chuan thu a sawi a. Mizoram politician-ten zir tur an la nei tam hle a, politics hi inbumna leh party din channa tur ringawt emaw ti an ni a, politics-in a tum ber an thelh thui ta hle tih sawiin, “Kum 40 dawn state kan ni tawh a, vawiin thleng hian Sairang leh Vairengte inkar kawngchhia kan la buaipui mup mup reng a, kan châklakna kawng pawimawh tak mai siam that tak tak a ni thei lo hian politics kan khelh danah development politics leh mipui awlsamna atana hmalakna tak tak kan thlen phak lohzia a tar lang chiang hle,” a ti.
PM Scheme hrang hrangah state sorkarin a kalpui dan hi a tha tawk lo hle nia a lan thu sawiin Vanupa Zathang chuan, “Vawiin thlenga Housing For All leh PM Scheme hrang hrang kalpui a nih dan en hian a lungchhiatthlak hle a ni. Sorkar chuan a ram mite hlawkna leh awlsamna a siamsak tur a nih laia, mipui chanvo it a, buai reng mai sorkar kan hrawn chhung chuan kan ram hian hma a sawn ngai dawn lo a ni,” a ti.
Vanupa Zathang chuan Mizoram hian BJP hi a mamawh tawh hle tih sawiin, BJP chuan nation first, party second, self last tih chu an thupui a nih avangin India pawhin nasa takin hma a sawn a, ramin hma a sawn chuan mipuiin hma an sawn ang a, mi mal chhungkaw tinah pawh hlawkna an hmu dawn tih a sawi.