Magnitude 8.8-a naa lirnghingin a sawi hnu lawkah Russia khawchhak kil hla tak, Kamchatka Peninsula-ah Inrinni zan atang khan tlang kang a inphuh chhuak a, scientist-te chuan kum 100 tam tak hnua a inphuh chhuah leh hmasak ber niin an sawi.
Krasheninnikov tlang kang hi km ruka sang van lamah a invawrh chho niin a awmna hmun, Kronotsky Reserve-a thawktute chuan an sawi a. Thlalak thehdarhah chuan a chung zawn chhumte chu meivap chhah takin a bawk tih a lang.
“A khu hi khawchhak hawiin Pacific Ocean lam a pan a. Mihring chenna lam a hawi lo va, a vap pawh mi chennaah tla a awm hriat a ni rih lo,” tiin Kamchatka-a emergencies ministry chuan Telegram-ah a tar lang.
Tlang kang a inphuh chhuah rual hian magnitude 7.0-a nain lir a nghing a, Kamchatka-a hmun thumah tsunami thleng thei vangin inralrinna khawn a ni a; mahse, a hnuah hlih leh a ni tih Russia-a emergency services ministry chuan a sawi.
“Tun hi kum 600 hnua Krasheninnikov tlang kang a inphuh chhuah leh vawi khatna nia hriat a ni,” tiin Kamchatka Volcanic Eruption Response Team-a an hotu, Olga Girina-i chuan Russian sorkar news agency RIA Novosti a hrilh.
US-a Smithsonian Institution-a Global Volcanism Program chuan Krasheninnikov inphuh chhuah hnuhnung ber a chhinchhiah chu kum 475 liam ta, 1550 tih a ni thung.
Kamchatka Volcanic Eruption Response Team chuan Pathianni tlai khan tlang kang hi a ziaawm tawh tih an sawi a, hetih rual hian ‘nasa vak lova la che thei’ a nih thu an sawi tel.
Nilaini tuk khan Russia-a Far East hi magnitude 8.8-a na lirnghingin a sawi a, hei vang hian tsunami fawn tenau chu Japan leh Alaska-ah thlengin Hawaii, North leh Central America leh Pacific thliarkar chhim lam, New Zealand thlengin inralrinna dar khawn phah a ni.