Health Minister Lalrinpuii’n Mizoramah kal (kidney) thlak theih ve tura hmalak chhoh mek a nih thu a sawi.
Nimin khan State Organ & Tissue Transplant Organisation (SOTTO) Mizoram, Directorate of Hospital & Medical Education chuan ‘15th Indian Organ Donation Day,’ DHME Auditorium-ah an hmang a. He hun hmanpuitu Health Minister Lalrinpuii chuan mamawhtute hnena taksa peng pek (organ donation) chu a ngaihpawimawh thu sawiin, Mizoramah pawh kalpui a nih ve theih nan health care facilities thuam chak tura hma lak mek zel a nih thu a sawi.
Health minister chuan sorkar laipui nen tangkawpin, SOTTO Mizoram kaihhruaina hnuaiah a bultan nan Civil Hospital, Aizawl-ah kal thlak theih ve tura hma lak chhoh mek niin, India rama kal natna bika hmingthang, Institute of Kidney Diseases & Research Centre, Ahmedabad-te nen MoU buaipui mek a nih thu a sawi.
Sawrkar laipui hnuaia transplant chungchanga thuneitu, National Organ & Tissue Transplant Organisation (NOTTO) report-a a lan danin India ramah kal thlak ngai bikah hian kum khatah mi nuai 2.5 bawr vel mamawhtu an awm laiin, mi 5,000 bawr chauhin kal dawn tur an nei a; thin thlak ngai hi mi 50,000-ah mi 1,500 bawr vel chauhin a thlakna tur an hmu a, lung thlakna tur pawh pawh kum khatah mi 5,000-ah mi 200 aia tlemin an hmu tawk tih a sawi bawk.