Ruahsur char char ni lo mahse ruahtui a tla deuh reng a, chhiatna hrang hrang thlen duh hun lai a ni.
Khawi hmunah pawh kan fimkhur zual a tul a, chhiatna lian tham em em thleng rih lo mahse kan lo fimkhur lehzual reng erawh a tha hle.
Lirthei hmanga eizawng leh zin veivak mite tan kan tlanna leh dinna hmun enchian leh enfiah a tul hle a, kan in leh a chhehvel kan finfiah fo pawh a tul awm e.
Ruahtui tla deuh reng avang hian kawng siam a sawt mawh viauin a rinawm a, pawimawh tawpkhawkah lo chuan lirthei tlan rih loh pawh a pawi lo hle.
A theih hram chuan mahni in lumah awm tam ila, chhuah chhen tum lo ila, sorkar hian zirna in hniam zawka zirlaite thleng hian a ngaihtuah tel a, khaw awmdan thlir chunga school an kai tir rih lo pawh a tha viau mai.
Ruahsur hun tur hre vek lo mah ila, khaw awmdan a en lawk vek theih tawh a, ruahtui kan la dawng deuh dawna hriat chuan naupang zawkte chawlhtir rih hi a tha viau. Khua a tha ta a nih leh a lawmawm a ni mai a, khaw chhe hnuaia an school kal leh bang huh hnuanga an awm hi hmuh a hrehawm thin. Damlohna thlenga an chunga thleng thei a ni a, zirna an tan chhoh leh tak tak hma a lo ni bawk nen, ruahmanna siamsak thei se a tha hle bawk.