Aizawl: MNF President Zoramthanga chuan Mizoram sorkarin a ruka state capital, Aizawl atanga Thenzawla sawn a tum dan kalphung chu thil kalhmang a nih loh thu leh MNF tan pawh pawm chi ni lovin, a tha lo an ti takzet tih a sawi.
Thawhtannia Mizo Hnam Run chhung inkhawm hun hnihna, political session-ah April 24, 2025 khan Seema Rani, section officer (AMRUT-IIB), MoHUA, New Delhi chuan chief secretary leh resident commissioner, Mizoram hnenah, ‘shifting of State Capital from Aizawl to Thenzawl, Mizoram’ tiin DPR siamna tur chungchang lehkha a thawn a. Hei bakah hian sorkar lehkha hmuh theihah Mizoram state capital sawnna tur thu hi a chuang tih a sawi.
Hemi chungchangah hian chief minister chuan Aizawl tawt tihziaawmna tura ‘peace city’ din tum a nih thu bak hi mipuiah puan zar a la nei lo tih sawiin, “NGO te leh party hrang hrang bakah Zoram mipuite pawh rawnna pakhat mah a awm hriat a ni lo va. Hetiang thu liantham hi chu cabinet meeting thutlukna tal pawh awm tur nia a lan laiin chutiang chu Zoram mipuite hian kan hre lo va. Chief minister thil tih dan hi thil nihphung pangngai ni lo, mipuite tana pawmpui remchang lo a ni,” tiin, MNF tan pawh a kalphung chu pawm chi ni lovin a tha lo an ti takzet tih a sawi.
MNF president chuan Mizoram state capital hi Thenzawlah sawn dawn pawh nise, Aizawl mipui tam zawk fein rem an tihpui loh tur a ni tih sawiin, “Rem an tihpui loh mai ni lo va, kan sorkar kalpui dan kalphung chu an nuih tiza tur a ni. Tun dinhmunah khawpui sawn chu thil harsa tak, sum leh pai tam tak luanralna tur leh mi tam tak nghawng tur a nih avangin, mahni duhthua thil kalpui ngawt chi a ni lo,” a ti bawk.