Aizawl: Champhai South bialtu MLA Lt. Col. Clement Lalhmingthanga chuan Mizoram Territorial Army Battalion (Home & Health) chu Operation Sindoor avanga din chawp tur a nih loh thu leh kum 2024 atang khan chief minister hma laknain din tura hmalak a lo ni tawh tih a sawi.
Thawhtannia ZPM-in an party pisa-a chhung inkhawm an hmanah Mizoram Territorial Army Battalion (Home & Hearth) din tura ram ngaihtuahtu tur committee a dina chairman ni bawk, Lt. Col. Clement Lalhmingthanga, MLA chuan ZPM sorkar, kalphung thar mipui sorkarin thil tha tam tak a tih zingah thalaite tana hna thawh tur tha tak mai, Territorial Army chu Chief Minister hma laknain Mizoramah din a ni dawn a, hei hi sorkar laipui leh state sorkar tangkawpin an din tur a ni a. Branch hrang hrangah departmental leh non-departmental a awm dawn tih a sawi.
Lt. Col Clement Lalhmingthanga chuan Territotial Army battalion chu kum 2024 atang khan Chief Minister Lalduhoma hma laknain Mizoramah din tura hma lak a lo ni tawh tih sawiin, “Operation Sindoor avanga din chawp tur a ni lo. Mizoram hian International border thui tak kan nei a, thenawmah ram buai Myanmar leh chhak lamah India nena innghirngho fo China a awm a, thlang lamah Bangladesh awm bawkin, India leh Mizoram tan Territorial Army kan mamawhna hi a sang em em a ni,” a ti.
Territorial Army hi ram leilung fa Mizote tan a hlu dawn a tih sawiin Lt Col. Clement Lalhmingthanga chuan, “Sipai dang ang lo takin mahni ramah pension thak thlenga awm theihna a ni dawn a. Sipai ni chungin eng hna pawh a zawngin a buaipui thei dawn a, sipai dang ang lo takin NGO-a inhman te, politician thlengin a nih theih bawk. Home posting hlang hlakin pension thleng an thawk thei dawn a, a dil turten tul leh pawimawh hrang hrang buaipui ngai leh an tlin ngeina turin tunah hian an tana tangkai thei tur training buatsaih mek a ni,” tiin, a bul tan nan mi 70 lak phawt a nih tur thu leh a thawh hnihnaah mi 140 lak leh tur niin, Mizo hlang batallion a ni dawn a, part time job a ni dawn a, hei tak mai hi a thatna tur a ni dawn tih sawiin, tling ngei turin thalaite lo inbuatsaih turin a chah.