Aizawl: July 21, 2025-a thi, Lalrintluanga Sailo, Dampa bialtu MLA chu nimin khan Aizawl Luangmual-a an chenna inah Mizoram Legislative Assembly member-ten an ral a, death gratuity an hlan.
Ralna hi Assembly Speaker Lalbiakzama’n kaihruaiin, Home Minister K. Sapdanga’n hunserh a hmang.
Mizoram Legislative Assembly Additional Secretary Lalthangmawia chuan Section 16 of the Mizoram Salaries, Allowances and Pension of MLA Act, 1999 angin Lalrintluanga Sailo nupui, Lalbiakthuami hnenah death gratuity Rs nuai 15 a hlan.
Ralna hun hmannaah hian Deputy Speaker Lalfamkima, Leader of Opposition Lalchhandama Ralte, MLA pahnih Dr. K. Beichhua leh C. Ngunlianchunga ten thlahna thu an sawi bawk.
Lalrintluanga Sailo hi kum 2003-ah MNF Gen. Hqrs-ah Joint Secretary atan ruat niin, kum 2009-ah MNF Gen. Hqrs General Secretary atan ruat a ni leh a. Kum 2018 leh 2023 inthlanpuiahte Dampa Bial atangin MLA-a thlan tlin a ni tawh bawk.