Sairang leh Kawnpui inkar kawng thawmthat hna thawh meka hnathawktuten harsatna an neihte chin fel zung zung a nih theih nan, PWD Minister Vanlalhlana’n Thawhtanni zan khan riakin a vilpui.
PWD minister chuan Sairang leh Kawnpui inkar kawng, lirthei tana tlan tlaka siam vat a nih theih nan PWD leh NHIDCL-a thawktute nen tangkawpin theihtawp chhuah zel a nih thu a sawi a. Hna sawt zawka kalpui a nih theih nana khawtlang hruaitute inpekna leh pawl hrang hrangte tanrualna chu lawmawm a tih thu a sawi.
He kawng zawha lirthei khalhtu tangkhangte leh harsatna hrang hrang tawk mekte chu, kawng tha neih a nih theih nana hmalaknate ngaichang chunga lo dawh hram hram turin minister hian a ngen a. Kawng thawm that hna zawh fel thuai a nih theih nan sorkarin lirthei tlan dan a ruahmante ngaih pawimawh a tul thu sawiin, hemi kawnga khawtlang hruaitute tawiawmnaah lawmthu a sawi bawk.
Sairang leh Kawnpui inkar kawng thawmthat hna kalpui mek chu PWD leh NHIDCL-a hnathawktute, khawtlang hruaitute bakah Minister leh MLA-ten ngawrh takin an vilpui zel a ni.
ZPM thalaite an hnatlang
ZPM Thalai General Headquarters member-te chu an president, Jeje Lalpekhlua, South Tuipui bialtu MLA hovin nimin khan Kawnpui leh Sairang inkar kawng chhe lai thawm thain hnatlangin an thawk chhuak. Tun dinhmunah lirthei tluk theihna tur khawpa khuar chhia awm tawh lo nia an hmuh thu an sawi.
ZPM Thalai Gen. Hqrs chuan Kawnpui leh Sairang inkar kawng chhia hi Mizoram mipui tana harsatna a siam nasatzia hriaa Mizoram PWD leh tlawmngai pawl hrang hrangin theihtawp chhuaha kawng an siam laia, a him chin atanga lo thlir ringawttu nih chu thil ni theiah an ngai lo va, an theih ang tawk ti ve turin an president, South Tuipui bialtu MLA Jeje Lalpekhlua hovin hnatlangin an thawk chhuak ta tih an sawi.
Kawnpui leh Sairang inkar kawng hi NHIDCL kuta hlan ni tawg mah se, a chhe lai siam kawngah PWD in hma a la zui zel tih sawiin, PWD Minister Vanlalhlana leh MPWD E-in-C H Zoramliana temn riahchilhin meuha an vil thu an sawi.
Tun dinhmunah Sairang leh Kawnpui inkarah lirthei tluk theihna tur khawpa khuar chhia a awm tawh lo nia an hmuh thu an sawi bawk.