Premier League CEO Richard Masters chuan tun hnaia ‘Premier League khel thei tur club chu 18 a ni tawh dawn’ tih thuthang awm chu a nih loh thu sawiin, a hma ang bawkin club 20 an la tel dawn thu a sawi.
Tun hnaiah inkhelh tur neuh neuh a tam avangin footballer-ten hun awl an nei tlem a, hei vang hian an inkhelh tlem theih zawk nan Premier League khel thei zat pawh 20 atanga 18-a tihtlem a ni dawn tih thu a thang nasa hle.
Football calendar a khat hneh thei lutuk a, hei hi tihtlem dan an ngaihtuah nasa hle a. Hetiang karah hian Premier League lamah pawh an inkhelh tlem theih zawk nan a khel thei tur club chu 20 atanga 18 a tihtlem rawtna a awm niin thu a thang a. Masters-a chuan tun dinhmunah hetiang rawtna hi a la awm chiah lo niin a sawi ve thung.
Club inelna leh ram inelna huang an zauh belh zel a, hei vang hian footballer ten hun awl an nei tlem hle a. Player, coach leh club-te chuan hahchawlhna hun an neih tlem thu an au chhuahpui nasa tawh hle a, season hlui leh thar inkarah ngai awh theihna hun pawh an nei tam lo tih an sawi bawk a. Hetiang kaihhnawihah hian Premier League pawh an zir chian nasat phah viau a ni.
Kumin nipui lai pawh hian footballer-te chu an tul mawlh mawlh hle a, Premier League club eng emaw zat chu US-a khelh, huang an zauh thar FIFA Club World Cup-ah pawh khan an tel a. Kha tournament vang khan season tan hmaa inpuahchahna hun pawh kar thum vel chauh an neih phah a. 2025-26 season chu August 15 atang hian an tan leh tawh dawn a ni.
Khawvel hmun hrang hrangah football chu a thang nasa hle tih sawiin, Masters chuan ram inelna huang zauh vangin club inelna chu a buai phah tur a ni lo tih a sawi.
Masters chuan, “Football thang zel hi tha ka ti a, than belh zel se tih hi ka duhthusam a ni a. Club hrang hrang inelna tha tak tak a awm zel a, chutih rualin ram hrang hrang league hi a buai phah tur a ni lo,” a ti.
Team 32 tel theihna Club World Cup kha a vawi khatna atan nipui laia buatsaih a ni a, kha khan a tel club-ho season tawp chawlh a pawt tawi vek a. Chawlh an neih tam ve loh avangin player-te pawh an hah deuh bik a ni.
Masters chuan, “Kum 1994 atang khan Premier League-ah hian club 20-te inkhelh zat chu 380 a ni a. Tun dinhmunah Europe mai ni lo, khawvel huapin football calendar siam rem a ni mek a ni,” a ti.
“Tun dinhmunah FIFA leh league lian thuneitute an inrawn mumal lo a, hei vang hian kal zel dan tur pawh a fel fai thei meuh lo a, hei hi a pawi hle a ni,” a ti bawk.