Aizawl: India rama sorkar damdawi in tha bik tehnaah Primary Health Centre pahnih – Khawlailung PHC leh Bairabi PHC bakah Urban Primary Health Centre pahnih – Lawipui UPHC leh Sihphir UPHC te an tel thar.
Dr. Lily Chhakchhuak, Mission Director, NHM hnen atanaga thu kan dawn danin, India rama sorkar damdawi in tha bik tehna, National Quality Assurance Standards (NQAS)-ah Khawlailung PHC, Bairabi PHC, Lawipui UPHC leh Sihphir UPHC chu an tling thar a, a tehnaah 93.84%, 84.89%, 93.63%, leh 93.93% te an hmu.
Mizoram puma PHC awm zingah NQAS National Certificate hmu hi 28 awmin, Urban PHC zingah panga an awm ta a ni.
Heti hian Mizoram chhunga sorkar damdawi in 41 te chu NQAS National Certificate nei tawh an ni a. Tunah hian sorkar damdawi in 18-in state level certificate neiin, national certificate result nghak mek pathum an awm bawk.
NQAS Certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni. Heatah hian 70% an hmuh chuan certified an ni chauh thin. Heng certified tawh damdawi inah te hian natna darh thei ven kawngah te, thawktu zawng zawngte an hna bil an thawhna kawngah te, an level zelah enkawlna an pek that dan te, a thlawna enkawlna leh damdawi pek te, damdawi in faina leh dik taka bawlhhlawh sawngbawl te, hawihawmna leh a vel fai kawngahte, environment vawn that kawngah te endik an ni.