Eugenie Bouchard chuan July 30 khan professional tennis huanga a tawpna atan singles a khel leh a, tennis khelh a chawlhsan thu a puang zui nghal.
World No. 5 leh Wimbledon finalist pawh lo ni tawh, Genie Bouchard hi an ram aiawhin Olympic Games-ah pawh a tel tawh a, July 30 khan Montreal khawpuia Omnium Banque Nationale presente par Rogers-ah a tel a, WTA professional match a khelh hnuhnun ber a ni ta a ni.
Thla hmasa tir lamah khan Canadian tennis star hian a chenna khuaah ngei a vanglaia a hnuhnung ber atan tournament a khelh tur thu a lo puang tawh a. Kum 31 mi hian second round-ah Switzerland mi, Belinda Bencic a hmachhawn a, 2-6, 6-3, 4-6 in a chak lo a ni.
Canada-a piang zingah chuan Grand Slam singles final lut thei hmasa ber niin, Bouchard hi Canadian team zingah chuan Billie Jean King Cup la thei hmasa ber zingah telin, kum 2023 khan an champion a ni.
A vanglaiin Eugenie hi vawi 300 a chak a, vawi 230 a chak lo bawk a. Kum 2008 khan kum 14 mi niin professional tennis huangah a tel tan a, a inlan tirhah hian Montreal khawpuia ITF Circuit-ah WTA qualifying match a khel a. Montreal chu a bul tanna a nih bakah a hnu kharna a ni leh ta chiah bawk a ni.
Bouchard chet fuh ber chu kum 2012 khan niin, Elina Svitolina hnehin Wimbledon hmeichhe champion a ni a. April 8, 2013 khan Top 100-ah a tel pha a, September, 2013-ah chuan Top 50-ah a chho hman a. He mi season chawhnu lamah hian Osaka khawpuia Japan Open-ah final a lut a, hei hi tour singles final a luh vawi riat zinga a hmasa ber niin, hemi kumah hian WTA Newcomer of the Year atan an thlang.
Kum 2014 khan Bouchard chuan Australian Open semi final a thleng a, French Open semi final a thleng bawk a. French Open semi final-ah hian Grand Slam title vawi li la tawh, Maria Sharapova nen an inkhel a, a hneh ta lo va, a champion zui nghe nghe a ni.
He mi kum hian Bouchard chu Wimbledon-ah Seeded No. 13 niin final a lut a. Semi final-ah No. 3 Simona Halep a hneh a, final-ah erawh Petra Kvitova a hneh ta lo a. October 20, 2014 khan ranking-a a thlen san ber tum a thleng a, No. 5 a ni.
Nurnberg-ah singles champion niin kum 2019 khan USA star Sofia Kenin nen Auckland ah doubles title an la bawk a. A vanglai hian Top 10 huanga awm lakah vawi 12 a chak a, lawmmanah $7 million bawr vel chu a la lut hman a ni.