India-in Jammu & Kashmir-in inhung hran bikna a neih a hlih champha kum ruknaah Pakistan-occupied Kashmir (PoK)-ah mi za telin kawng an zawh.
Thawhlehnia pungkhawmte hian ram pahnih intihbuaina ber hmun berah hian India chu a awp chin Kashmir hnenah state nihna pe leh turin an ti a ni.
India danpuia Article 370 hmangin Kashmir & Jammu hian mahnia inhung bikna a nei thin a, hei hi August 5, 2019 khan Prime Minister Narendra Modi-a kaihhruai sorkar chuan dan hmangvekin a hlihsak.
Inhung bikna a neih hian he state-a cheng tam ber, Muslim-te tan chanvo tha tak pein dan hran an nei thei a, ram venhimna, inbiakpawhna leh ram dang dawr tih lohvah chuan dan pawh a hranin an insiam thei.
Thawhlehnia duh lohna lantirna pui ber hi PoK khawpui, Muzaffarabad-ah neih niin khawthlang huap pawl hruaitu leh political party mite an tel tam hle a. Pakistani khawpui, Islamabad-ah pawh India duh lohna pungkhawn huaihawt niin Deputy Prime Minister Ishaq Dar chuan Pakistan chuan Kashmiri-te ‘India-in dik lo taka a luahsak hmuna zalenna a neih’ chu an thlawp tih a sawi.
India-a Srinagar khawpuiah pawh eptu, Congress party chuan sorkarin ram buai tak hmunah hian state nihna pe leh tura an duhna lantirin kawng an zawh bawk.
Thla thum liam taa Pahalgam-a mi firfiakte chetna, New Delhi-in Islamabad tihah puhin Pakistan chuan a pha a. He thil thleng avang hian ram pahnihte hi sipai chakna hmangin an inkap nghe nghe.
May thlaa an inbeihna hi kum 1999 hnua nuclear nei ram inthenawmte an intihbuai nasat ber niin missile, drone leh laipui hmanga inbeiin mi 70 chuang thi an awm a. May 10-ah inkahhai an puang zui a ni.
New Delhi chuan kar hmasa khan Pakistani mipa pathum, Pahalgam beihna thlentu zinga mite chu Srinagar daiah an that tih an puang bawk.
India-a court sang ber chuan Kashmir-in state nihna a neih lehna tura ngenna lut chu a ngaihtuah dawn bawk a, Zirtawpniah a mi cheng mi pahnihin thu an thlen hi ngaihtuah a ni dawn tih a sawi.
State nihna hlihsak a nih hnua a vawi khat nan November khan Kashmir-ah inthlan huaihawt a ni a, tualto party-in hnehna an chang a; mahse, an sorkar hian state pangngai angin tih theih a ngah lo va, New Delhi-in a dah Lt. Governor chu awptu pui ber a ni.