Aizawl: Tuikum bialtu MLA PC Vanlalruata chuan Mizoram sorkarin zirna tha neih a nih theih nan chak taka hma a lak thu sawiin, mipui pawhin sorkar sikul an rin ngam a pawimawh tih a sawi.
Nimin khan Chhiahtlang Higher Secondary School building thar chu bialtu MLA PC Vanlalruata’n a hawng a. Hawnna inkhawmah thu sawiin, “Zirna a that loh chuan a tuartu chu mipui kan ni a, zirlaiten zirna tha an dawn loh chuan ram hmabak a thim a ni. Education quality hi a tha tur a ni a, ram hmabak hriltu a nih avangin mi zawng zawng hian zirna tha kan ngai pawimawh tur a ni,” a ti.
Agriculture Minister PC Vanlalruata chuan, sorkar laipuiin New Education Policy a kalpui mek a, India ram zirnain khawvel ram dangte zirna a tluk ve theih nan hma a la mek tih sawiin, “Kan tu leh fa ten zirna tha an neih theih nan central sorkar pawhin hma a la mek a, chumi bawhzui chuan Mizoram sorkar pawhin zirna tha kan neih theih nan hma chak takin a la a, mipui pawhin sawrkar school kan rin ngam a pawimawh,” tiin, tu leh fate zirna hi ngai pawimawh zel tur leh sorkar hmalaknate thlawp a, thawhpui turin mipui a sawm.