Aizawl: Chief Minister Lalduhoma’n CBI hnena general consent pe anga a la insawi fo chu mipui bumna dik takah an ngaih thu Congress party chuan an sawi.
Nimina thuchhuah an siamah MPCC Communication department chuan, August 15-a Aizawla Independence Day lawmna a hmanpuinaah Chief Minister Lalduhoma’n eirukna do dan kalphung tha zawk sorkarin a siam tih a sawi a, CBI hnenah general consent pe anga a la insawi fo mai chu mipui bumna dik takah an ngaih thu an sawi.
December, 2023-a ZPM sorkar lak luh a nih hnu lawk, December 28, 2023-ah CBI hnenah general consent hi an pe ngei a. Sorkar hnathawk tupawh Mizoram sorkar remtihna la hma lovin an chhui thei a. Hei hi a hnu lawkah tidanglamin sorkar hnathawkte leh public undertaking hnuaia hnathawk zawng zawngte CBI-in a chhui dawn a nih chuan Mizoram sorkar hnenah phalna lak hmasak zel a ngai tih thupek chu July 1, 2024 khan sorkar chuan a chhuah leh a. Hei hi general consent ni lovin, partial consent a ni tih Zoram mipuiten lo hria se an duh tih an sawi.
MPCC chuan Lalduhoma chu mipui buma, ama thu chhuah ngei pawh hai der luia dawt chiang taka a sawi duh mai hi an dem tak zet tih sawiin, “Ram zalenna humhim tur leh ramin hma a sawn zel theih nana beitu, PM Narendra Modi leh a thawhpuite kut tichak tura Mizo mipui a sawmte kha thil zahthlak tak a ni,” an ti.
Congress party chuan, tun hnai lawkah Mizoram aiawh MP(LS) chu NDA Floor Leaders’ Meeting-ah a tel ngei tih hriat a ni a. Hei mai ni lo vin, Remna Ni-ah NDA/BJP nena in thian thatna chungchang CM hian a lo sawi tawh bawk tih sawiin, “BJP-ten Kristian-te tan harsatna tam tak min siam chunga BJP hotute kut ti chak tura Mizo mipuite a sawm ngam kha thil zahthlak tak a nih bakah, Kohhran zah lohnaah Congress Party chuan a ngai,” an ti bawk.