Aizawl: DP&AR Minister K. Sapdanga’n Lunglei Theiriata Mizoram Polytechnic Lunglei (MPL) hmunhma leh Pukpuia Mizoram Engineering College (MEC) tur hmun hmate tlawhin, Inrinni khan an dinhmun a enfiah.
Mizoram Polytechnic Lunglei a tlawhnaah hian Higher & Technical Education (H&TE) Director Laltanpuia ho vin, MPL Principal Er Lalnuntluanga leh thawktuten lo dawngsawngin, MPL dinhmun leh mamawhte an lo thlen.
MPL Principal Er Lalnuntluanga chuan ram luah man chungchanga court thubuai vanga June ni 27, 2025-a MPL building eng emaw zat kalh chu, sorkar hma laknain August ni 12, 2025-ah hawn a nih leh tawh thu leh class pawh pangngai taka kalpui a nih tawh thu a sawi.
UD&PA minister ni bawk, K. Sapdanga chuan tluang tak leh tha taka MPL zirna kalpui a nih theih nan sorkarin theihtawp a chhuah tih sawiin, harsatna leh mamawh la awm, building thuam that leh thawktu indaih lohna phuhrukna tur te pawh a tul anga ngaihtuah chhoh zel a nih tur thu a sawi.
Minister hian Pukpuia MEC tura sak chu tlawh bawkin, a dinhmun a enfiah bakah official-te nen zirna tan thei tura hma lakna leh hmabak awmte an sawi ho a. K Sapdanga chuan MEC chu Chief Minister-in a duh ang ngeia kum 2026-2027 session-a tan hman a nih theih nan tha tak leh chak taka hna thawk turin department hotute leh thawm that ngai leh buaipui ngai hrang hranga mawhphurtute chu a chah.
MEC-ah hian building ding lai pariat awmin, sorkarin a thawm thatna tur Rs vbc 25.41 a ruahman chu kawng (approach road) siamna atan Rs nuai 750 (MPWD kutah), tui pekna leh dah khawlna (water supply & storage) atan Rs nuai 249.44 (PHED), eng pekna leh transformer bunna atan Rs nuai 106.36 (P&ED) leh H&TE kutah campus tihchangtlunna te, hmanrua leh bungraw hrang hrang leina atan Rs nuai 1,435.39 dah a ni.