Revenue Minister B. Lalchhanzova chuan land revenue rule siam thatna dan chu Assembly session-a pharh turin an inbuatsaih mek tih a sawi.
Nilaini khan Revenue Minister B Lalchhanzova pisa-ah Venbuk ram, Vaivakawn land lease inhlanna hun hman a ni a. Inkhawmah thu sawiin B Lalchhanzova chuan revenue department hi an insiam tha chho zel tih sawiin, “Department chhungah monitoring mechanism kan duang a, kan land revenue rule amendment-te pawh assembly-a pharh turin kan inbuatsaih mek a ni,” a ti.
Kum eng emaw zat atangin Vaivakawn Venbuk ram chu buaipui a nih tawh thu sawiin B Lalchhanzova chuan, “Ram buai chin fel hi a hautak hle mai a, department leh mipuite kan tanrual chuan heng harsatnate hi awlsam zawkin a chin fel theih a ni tih vawiina land lease kan inhlan hian a tichiang hle a ni,” tiin, Aizawl West II bialtu MLA Lalnghinglova Hmar-in theihtawp a chhuah a, tunah chuan Vaivakawn khawtlang kutah Venbuk ram a lo awm thei ta chu a lawmpui thu leh, khawtlang tan tangkai taka hman a nih ngei a beisei thu a sawi.
Inkhawm kaihruaitu, bialtu MLA Lalnghinglova Hmar, Excise Minister pawhin thu sawiin, “Vawiin hian Vaivakawn khawtlang tana mellung pawimawh tak tih theih tur lung kan phum thei a, khawtlang hruaitute thawhrimna zarah a hlawhtlinna hmel kan hmu chho thei hi ka lawm hle a ni,” tiin, tuna ram an tihfel tak hi khawtlang tan rotling leh tangkai taka hman a nih theih nan; khawtlang hruaitute leh an hotuten ngaihtuahna an seng chhunzawm zel dawn a, Aizawl luhna leh kawtchhuah lun lai a nih avangin thianghlim leh felfai taka enkawl pawh a ngai dawn tih a sawi.