First round pelh pawh inring lo kha Top 10 zingah pawh mi ngaihven hlawh a ni tawh a, a inlan leh hun nghakhlel pawh an tam ta hle.
LPS Vision buatsaih, Mahindra XUV 3XO Mizo Talent Top 10 intihsiak chu zaninah neih leh a ni dawn a, Kolasib nula, Lucy Lalthazuali lâm leh tur chu mite ngaihven a tling mek.
Lam tura intihsiak a hmachhawn vawi khatnaah ram pum huap hriat hlawhin a in vawrh a, intihsiakna a hmachhawn mek. Mizo Talent top 10 ah a in hlang kai bawk a, lam thiam ngaihzawn rawn Lucy-i a in lan leh hun tur nghakhlel an tam hle.
“Top 10 ka thlen ka inring lo, ka beisei phak bak a ni, Pathian malsawmna ka dawng nasa hle,” tia sawitu, Lucy-i chuan Mizo Talent-ah hian tel tumna a nei lo va; mahse a buatsaihtuten hming pek theih hun an pawh sei takah khan hmasawnna kawng zawh nan tel ve tulin a hre thar a, hun tawp dawn hnaihah a hming pawh a pe lut ta chauh tih a sawi.
Taekwondo blackbelt ngat, Lucy-i hi first round-ah khan a che tha hle a, Judge Mapuia’n chuan a hmelin ‘tha’ a entir a, a lâmin ‘zei’ a entir tia an inbiakna chuan lawm a hlawh a. Social media leh video sharing app-ah entu ngah ber pawl a ni chho ta a ni.
Lucy-i hi a naupan laia a thiante nen sikula an lâm thin tih loh chu mipui hmaah a lâm tam lem lo va, in lamah erawh chuan taksa sawizawi pahin a lâm thin a, tunah erawh chuan a lâm thiam tih hi Mizoram pumin a hre ta a ni.
TV Reality Show ngaihhlut hlawh tak ni mek, Mahindra XUV 3XO Mizo Talent Top 10 intihsiakna hi zanin hian LPS Arena, Falkland, Aizawlah neih a ni leh dawn a, LPS 1-ah live-in pek chhuah a ni ang a, a hmunah a chhim theih bawk ang.