Tunhma atanga hnamdangin min chim ral loh nana kan ram venhimna awmchhun chu kan Inner line permit hi a ni a. Vawiin nia hnam anga kan la awm theihna chhan pawh hi ILP vang a ni ti ila a sual tam hauh lovang. Kan ramah hian vaiho hian rawn luh a, eizawn nana rawn awmngheh hi an châk zek zek reng a ni tih hi kan zavaia kan pawm a ngai a. Chumi pawm lo a vawiin ni thlenga vaiho la welcome em em pawh hi kan tam ta hle. Mahse, a mipui nawlpui hi chuan vaiho hi kan pawm lova. Danin a phal chin ang bak hi chuan rawn khawsa lo se tih hi kan duh vek bawkin a lang.
Vaiho in min rawn chim ral lohna kawng tha ber chu keimahniah hian a awm a. Pawisa duh a, hnathawh tur duha lo lut vek an ni a. Hengho lo dan dan tha ber chu chhawr loh hram hram tum tur. Kan chhawr loh theih lohnaah pawh fimkhur ila. Vaiho hi mizo in kan sponsor loh chuan an lo lut thei lo. Permit hi mizo tel lovin a neih theih loh a. Chuvangin vaiho lo sponsor a, an lo luh theihna tura phalna lo dil sak thintute hian an vai sponsor te hi an vil zui tur a ni. Tunah hian sponsor tu tam ber hian an vai hi an vil zui lova, an chhuah zalen a. Chuvangin vai permit nei lo, khawtual mi anga awm zui ta mai mai an tam phah em em a ni.
Tin, vai sponsor tu te hi an vai sponsor lakah hian mawh kan phurh tir lo lutuk hi a pawi bawk. Vai sponsor tu hian a vaite an cham rei/ an permit huam bak an pelh chuan pawisa chawi tir ila kan zia deuh ang. A enkawltu department hian heng vai lo lutte hi an permit a ral tawh em tih hi an vil zui bawk tur a ni. Mihring /thawktu a hautak ngei ang. Mahse, tunlai khawvelah mitinin smart phone kan hum vek tawh a. Vai sponsor tu phone ah hian an vai permit a tawp tawh thu hi message emaw, eng apps hmangin emaw hrilh zat zat se vai sponsor tu nih hi a nuam hauh lovang a. An awm tur chin aia an cham rei chuan a sponsor tu hian pawisa a chawi theih dante pawh hi siam ila a dik ang.
Vaiho tan hian kan hlauhawm lovin kan zahawm tawk lova, chuvangin he kan inhumhimna dan awmchhun talhfiak hmang hian i han in sang mar leh deuh teh ang u. Hman zan lawka Vairengte gate a ILP check vanga buaina a han chhuak dawn maite kha inzir nan i hmang hram ang u.
Tin, khawvel pumah migrant workers hi an awm zel a, a control lo ram apiang an buai a, India ram state dangah pawh a ni tho. Kan lo inventhiam ve chu a va ngai em.