National Council of Educational Research and Training (NCERT) chuan Operation Sindoor chungchang zirlaia zir tura a ruahman chu a tichhuak a, pawl thum leh 12 inkarah zir a ni dawn.
PTI-in a tar lan dan chuan zirlai atana ruahmana siam remah Operation Sindoor chu ‘sipai beihpui thlakna ngawi a ni lo va, muanna leh nunna zahawm tak humhim tiamna a ni tel’ tih a ni.
NCERT-in an duan dan chuan Pahalgam-a mi firfiakten mi an beiha Pakistan inrawlh nia a lan dan pawh tihlan a ni.
“Pakistan hian Pahalgam-a mi firfiakte chetnaah khan inrawlh lo angin insawi mah se an sipai leh politics-a an hruaitute thupeka che an ni,” tiin NCERT duanah hian tar lan a ni.
The Print chanchinbu chuan zir dan tur ruahman chi hnih awmin pakhat hi ‘Operation Sindoor—A Saga of Valour’ tih a ni a, hei hi pawl thum leh riat inkarte zir tur a ni a. ‘Operation Sindoor—A Mission of Honour and Bravery’ tih chu pawl kua leh 12 inkara zir tura ruahman a ni.
Kar hmasa khan NCERT hian ‘Partition Horrors Remembrance Day’ tia a vuah, India-in zalenna a hmuh tirha India leh Pakistan ram then chungchang lanna zir tura ruahman a lo tichhuak tawh bawk.
Zirlai tur duana thu intar lan dan chuan Congress leh BJP inkarah inhnialna a siam phah nghe nghe a. Ram then kha mi pathum vanga lo thleng anga tar lan a ni a – ‘Jinnah, a duhtu; Congress, a pawmtu leh Mountbatten, a taka kalpuitu’ tia tar lan chu an inhnialna a ni.
Ram inthen chungchang leh Operation Sindoor hi zirlaite hnenah an zirlaipuia tel lovin belhchhahtu (supplementary reading)-a telh tur a ni a, zirlai pangngaia tel tur chuan hnialna a awm a ni.
Operation Sindoor kha April 22-a mi firfiakten Pahalgam-a mi 26 an thah phuba laa Indian sipaite chet chhuahna a ni.
May thlaa beihpui thlaknaah hian Pakistan leh Pakistan-occupied Kashmir (PoK)-a mi firfiakte leh an awmna hmun tam tak tihchhiat a ni.
He thil avang hian India leh Pakistan chu inbei zuiin a vawi nga nan inthenawm ram hnih hi an indo va. Ni li an inkah hnuah inkahhai an puang zui a ni.