Mizo Idol Season 8-naa tel tumten hming an pe lut mek zel a, chawlhkar khat chhungin mi 200 chuangin an hming an pe tawh a, tun thla chhung hun hawn a ni.
Zonet buatsaih, Mizo Idol Season 8-naa tel tumte tan hian application form lak chhuah ngai lovin virtual audition neih tur a ni a. Kar kal ta Ningani atang khan Telegram hmangin mahni zai lai video thehluh theih niin tun thla chhung hun hawn a ni.
Mizo Idol thlannaah hian kum 15 atanga kum 30 inkar, Mizo hla sa thei apiang tel theih a ni a. Video theh luhah hian a hângin Mizo hla chang khat leh a thunawn sak tur a ni a, vawi khat record-ah a tluana sak tura tih a ni.
Hla record nan hian phone camera chauh hman phal a ni a, video leh audio khawih danglam phal a ni lo bawk.
Mizo Idol thlanna turah hian India khua leh tui ni lo tan pawh tel theih a ni a, hetiang mite tan hian an kum zat tihchianna erawh an neih a ngai thung.
Video theh lut turte hian an zai tan hmain an hming, veng leh khua sawi hmasak tur a ni a, video an theh luh rualin an nihna tichiang turin Aadhar card emaw, Voters ID emaw, driving license emaw thawn tel tur a ni bawk.
Video hi Telegram hmangin phone number 9436140012-ah thehluh theih zel a la ni.