Aizawl: Excise Minister Lalnghinglova Hmar chuan nimin khan Phunchawnga ruihhlo ngaite enkawlna, Operation Kingdom Ministry (OKM) Home a tlawh.
Lalnghinglova Hmar chuan thalai hna thawk rual eng emaw zat, ruihhlo vanga inkhungkhawm ngai chu pawi a tih thu a sawi a. Chutihrualin, home-a lutte hi an hneh loh hriaa an nihna zahpui lova huaisen taka luta bul tan ta sa sa, hlawhtling turin a tawp thleng ngei turin a chah.
LESDE minister ni bawk, Lalnghinglova Hmar chuan OKM Home-a thawktu leh zirlaite chu home-a an awm chhungin in sak leh a kaihhnawihah an thawh thin avangin LESDE department-in Mizoram Building & Other Construction Workers Welfare Board (MBOCWWB) registration campaign neih hunah member ni tura inziak lut theuh tura chahin, board member-te tan skill development kalpui tum a nih thu leh OKM Home-a member-te pawh an tel theih tur thu a sawi bawk.
Minister chuan OKM Home-a awmte hna thawh nan cement mixer a pe a, sports bungrua leh pawisa fai Rs. 30,000 a hlan a ni.
OKM Home-ah tun dinhmunah mi 430 an awm a, Tuikhuahtlang Presbyterian hmeichhiain kumin March atangin thla khatah Rs. 5000 an pek leh, Vaivakawn chawhmeh zuarten Inrinniah chawhmeh an pek thin bak chu rinnain an kal tih a dintu, Lalruatpuii’n a sawi.
OKM Home-ah hian luh man leh awm man a awm lo va. Lut thar tan thla sarih course siam niin, course zawh hnuah a duh tan rawngbawltuah a inpek theih a ni a. Lut nawn tan thla 9 – 11 course siam a ni bawk.