Aizawl: Aizawl District Police Officer-te thukhawm chuan, tun hnaia Mizorama rawn luh tum, ram dang mi ILP dil an tam thut chu ngaih that lohna tur a awm lohah an ngaih thu leh Assam-in ramdangmi hnawhchhuah a kalpui mek chu tun dinhmunah Aizawl district leh Aizawl khawpui a tihbuaina tur hriat a la nih loh thu an sawi.
Nimina Aizawl SP pisa-a Aizawl khawpui chhunga Sub-Divisional Police Officer (SDPO) leh Police Station-a Officer-in-Charge (OC)-te’n Bengal Eastern Frontier Regulations (BEFR), 1873 hnuaia Inner Line Permit (ILP) kenkawh mek dan sawi hovin an thutkhawmnaah, tunlai Aizawl district chhunga ILP neih ngai hnam dangte lo luh dan thlirhona an nei nghal bawk.
Thutkhawmah hian August ni 20 – September ni 11, 2025 thleng awh tur, CAPF, SSF leh Assam Rifle rifleman lakna kal mek avanga candidate 7,422 lai Aizawl a an fuankhawm mek chuan, ILP dilna a tih tam mai bakah khawlaiah veivak a tihtam thu an sawi a. Sipai intlar tur a lo lut thalaite hi, sipai lak a zawh chuan mahni awmna lama haw leh mai tura ngaih avangin, ngaih that lohna tur a awmloah an ngaih thu an sawi a. Hetianga recruitment rally lian a awm leh dawn chuan candidate ten a tlachawp a ILP dil lo vin, online a dil theihna hrilhhriat ni se harsatna tam tak a sutkian a rinawm thu pawh sawilan a ni.
Assam state-a ramdangmi hnawhchhuahna kal mekin, Aizawl district leh Aizawl khawpui a nghawng em tih pawh sawiho a ni a. Hmalakna hi Darrang. Dhubri, Goalpara, Golaghat, Hojai, Morigaon leh Nagaon District-te an ni hlawm a, Mizoram atang a hla tak vek an nih avangin tun dinhmunah chuan Aizawl a tihbuaina tur hriat a la nih loh bakah, heng district atanga lo lut an awm hriat a la nih loh thu sawilan a ni a. Amaherawhchu, fimkhur thuah erawh ILP checking beihpui thlak laiin uluk lehzual a hmalak turin rel a ni.