Lionel Messi chuan India a tlawh dawn chiang ta a, bul tanna atan December 12-ah Kolkata a tlawh phawt dawn niin promoter-te chuan an sawi.
Promoter Satadru Dutta chuan Messi chu December thlaah India a kal dawn chiang tih sawiin he event hi ‘GOAT Tour of India 2025’ tih hming an vuah a. Kolkata a tlawh hnuah hian Ahmedabad, Mumbai leh New Delhi a tlawh dawn niin a sawi a, December 15-ah Prime Minister Narendra Modi pawh a chenna inah a tlawh dawn tih a sawi bawk.
Argentine superstar hian kum 2011 khan India a tlawh tawh a, Salt Lake Stadium-ah Argentina leh Venezuela te chuan FIFA friendly match an khel a, he mi hnua a zin leh hmasak ber a ni ang.
Dutta chuan, “He event neih remtihna leh phalsakna ka nei fel tawh a; chuvangin, social media-ah ka puangzar zui a. Messi chuan August 28 leh September 1 bawr velah a puang ve chauh dawn a, hetah hian poster vel tihdarh a nih dawn bakah he tour chungchang kimchang zawk hi a hriat theih ang,” a ti.
Dutta hian kumin kumtir lam khan Messi pa hmuin he mi chungchang hi a lo sawipui tan tawh a. February 28 khan Argentina captain hi a chenna inah a dawr a, minute 45 vel an sawi dun a ni.
“Kan ruahmanna chungchang ka hrilh a, eng nge tih kan duh tihte ka sawipui a, a rilrem zawng tak a nih hmel a, rawn kal hi a titlu ta a ni,” a ti.
Messi hi Inter Miami-a a khelhpui – Rodrigo De Paul, Luis Suarez, Jordi Alba leh Sergio Busquets te pawhin an zui mai thei niin Dutta chuan a sawi a, player thenkhat hming sawi lan duh loh a nei bawk.
India a tlawh hunah Messi hian Kolkata, Ahmedabad, Mumbai leh New Delhi-ah hian naupang a kawm zel ang a, football khawvela zinkawng mumal tak an zawh theih nan kawng a kawhhmuh dawn a ni.
December 12 zanah Kolkata-ah thlawhnain a tum ang a, ni hnih leh zan khat chhung a cham ang a. December 13 zingah amah lawmna hun an hmang dawn a. Chhunah a lim an siam chu an hawng ang a, chu mi hnuah ‘GOAT Concert’ leh ‘GOAT Cup’ neih zui a ni ang a, an neihna hmun tur hi Eden Gardens emaw, Salt Lake Stadium emaw a ni ang.
Organiser-te chuan ticket hralh zawh vek an inring hle a, ticket man hi Rs. 3,500 atanga tan tur a ni ang a. West Bengal Chief Minister Mamata Banerjee chuan Messi lawmna hun hi a hmang dawn a, venhimna pawh theihtawpin an uluk dawn a ni.
December 13 tlai lamah Messi hian Ahmedabad a pan ang a, Adani Foundation-in event an lo buatsaih dawn a. December 14-ah Mumbai-ah hun a hmang leh ang a, CCI, Brabourne-ah inlawmna hun an hmang ang a, Wankhede Stadium-ah GOAT Concert leh GOAT Cup neih a ni ve leh ang.
Brabourne-ah hian Mumbai Padel GOAT Cup an khel dawn a, hetah hian Shah Rukh Khan leh Leander Paes te pawh an tel dawn niin an sawi a, Messi pawh minute nga atanga 10 chhung vel chu a tel ve dawn niin an sawi.
Maharashtra Cricket Association chuan Messi chu Sachin Tendulkar, MS Dhoni leh Rohit Sharma te bakah Bollywood star Ranveer Singh, Aamir Khan leh Tiger Shroff te nen inkawptir an tum a ni.
December 15-ah Messi hian Delhi a tlawh ang a, hetah hian Modi chu a chenna inah a hmu ang a, Feroz Shah Kotla-ah GOAT Concert leh GOAT Cup a chhim zui dawn a. Delhi District Cricket Association chuan Virat Kohli bakah Lionel Messi ngaisangtu, Shubman Gill chu an sawm tel dawn niin an sawi a ni.