Assam-in an rama Bangladesh atanga lutte umchhuah hna a thawh mek laiin hmarchhak state hrang hrangte pawh an inralring hlawm a. Mizoramah pawh heng mite an nih leh nih loh hriat chian loh hnam dang lut an pung nasa hle.
Mizoram luhkapui ber pakhat, Vairengte-ah chuan hnam dangte hi zanlaiah an lut ber thin a, a bik takin zing dar 01:00 velah lut tanin, dar 3/4 velah phei chuan an tam hle thin tawh tih Vairengtea MZP President HK Vanlalhruaia chuan The Zozam Times a hrilh.
Vairengte MZP president sawi danin zantir lamah chuan tu vak mah lut an awm ngai lo a, zan a rei telh telh a, lut tam tulh tulhin vartianah phei chuan an zi hut hut tawh tih a sawi a, “Hei hi chawlhkar tir vel atanga intan kha a ni,” a ti.
“Keini chuan zantir hi chu an tlem avangin kan enpui vak lo a, zan reiah duty kan indah thin,” a ti a. “Sorkarin ILP check-na pakhat chauh a siam avangin a endiktu pawh an indaih lo va. Hnam dangho hian CAPF admit card an neih zel bawk avangin kan theihtawpin kan lo endik ve tawp thin a, tlawmngaih kan lo chhuah hram hram a ni ber,” a ti.
Hetiang bawk hi Bairabi-ah pawh thlengin, Bairabia MZP hruaitute chuan zan reiah duty an indah thin thu leh an theihtawpa dan dika lo lut an ni em tih an lo enfiah ve thin thu an sawi a; sorkar hian ILP check-na a ngaihven thar a, a thuam chak lehzual bakah mihring a dah belh a tul hle a an hriat thu an sawi.