Samajwadi Party chief Akhilesh Yadav-a chuan Congress hruaitu, Rahul Gandhi-a’n ‘Voter Adhikar Yatra’ a neih mek chu Sitamarhi-ah August 28 hian a zawm ve dawn tih Congress General Secretary K C Venugopal-a’n Nilaini khan a sawi.
Yadav-a’n Gandhi-a leh Mahagathbandhan-a tel party hruaitu dangten yatra an neih mek a tawiawm tur hian ‘vote ruk dova mipui thawhchhuahna’ chu a tiphuisui sawt dawn tih a sawi.
“Uttar Pradesh chief minister hlui, Samajwadi Party President Pu Akhilesh Yadav-a chuan Voter Adhikar Yatra hi Sitamarhi, Bihar-ah August 28 hian a zawm ve dawn a ni,” tiin Venugopal-a hian X-ah a tar lang.
“Pu Akhilesh-a hian Leader of Opposition Pu Rahul Gandhi, Bihar deputy chief minister thin, Pu Tejashwi Yadav-a leh INDIA-a hruaitu dangten mi nawlpuiin vote ruk duh lohna an lantir a zawm ve dawn a, hei hian yatra hi a tiphuisui sawt dawn a ni,” tiin a tar lang tel bawk.
Gandhi-a’n Bihar pum fang tura yatra a kalpui mek hi Nilaini khan an chawl a, Ningani khan Nalanda atangin an chhunzawm leh.
Pathiannia Sasaram atanga tan yatra hian Thawhlehni khan Nalanda an thleng a, ke leh lirtheia kawng zawh niin Gandhi-a’n Lok Sabha inthlan hma lawka Manipur atanga Mumbai thleng kawng zawha Bharat Jodo Nyay Yatra a neih ang zulzuia kalpui kha a ni.
Lakhisarai, Munger, Bhagalpur, Katihar, Purnea, Araria, Supaul, Madhubani, Darbhanga, Sitamarhi, East Champaran, West Champaran, Gopalganj, Siwan, Chhapra leh Ara an hrut chhuak vek dawn a ni.