Aizawl: Sports & Youth Services Minister Lalnghinglova Hmar chuan nimin khan infiamna nihphung leh a bulthut inzirtirna hmun tur, Grassroots Sports Development Programme (GSDP) a hawng a, infiamna tihhmasawn nana innghahna pawimawh ber chu grassroots sports a nih thu a sawi.
Ramhlun Indoor stadium-ah hawnna inkhawmah Mizoram State Sports Council (MSSC) President ni bawk Lalnghinglova Hmar chuan, naupang an nih lai atanga uluk tak leh mumal taka, hmathlir fel tak neia kaihhruaina nen an inzirtir chuan tun ai hian infiamna lamah an thangduang thei dawn tih a sawi a. Trainer leh Assistant trainer te chu an zirtir chhuah naupangte chu naupang dangte aia thiam bik an nih leh chhinchhiah awl bik an nih loh chuan an hlawhchham tihna a ni dawn a. An zirtir naupangte an puitlin hunah National Games-ah hlawhtlinna an chan ngei a beisei thu sawiin, Olympic 2036-ah Mizo hming tithatu tur chherchhuak ngei turin a chah.
January 13, 2025 khan Education Minister Dr Vanlalthlana leh Sports Minister Lalnghinglova Hmar te hriatpuinain Mizoram State Sports Council (MSSC) leh Samagra Shiksha Mizoram (SSM) te chuan thawhhona thuthlung (MoU) an ziak a. He MoU hmang hian Grassroots Sports Development Programme (GSDP) chu Mizoram hmun hrang hrangah kum 2025-2026 chhungin kalpui tum niin, kumin September thla atanga chhiar tanin thla ruk chhung kalpui a ni ang. Zirlai naupang kum 6 – 14 inkarte inkarte infiamna nihphung leh bul thut inzirtirna hmun tur a ni.
GSDP hnuaia infiamna pakua – Archery, Badminton, Boxing, Football, Hockey, Judo, Taekwondo, Weightlifting leh Wrestling-ah te hma lak a ni ang.