Congress Thalai chuan Chief Minister Lalduhoma chu Mizo mipuite hnenah thu dik lo sawi a chin bânsan turin an phut thu an sawi.
Nimin khan MPYCC chuan Aizawl Press Club-ah thu thar thehdarhtute an kawm a. MPYCC Sr Vice President Ngurdingpuia Pachuau chuan tun hnaia chief minister-in a Facebook-ah Mizo thalai 300, Border Security Force (BSF)-a lakna tur chu Union Home Minister Amit Shah hnena a dil chhuah anga a sawi chu thu dik lo hulhual a nih thu a sawi.
Ngurdingpuia Pachuau chuan kum 2023 khan Ministry of Home Affairs chuan India ram pum tan BSF constable 3,588 lak phalna a pe a. Mizorama 300 lakna tur advertisement chhuak mek pawh hi chumi tho chu a ni a. Mizoram rual hian BSF lak tur inzat chiahin Meghalaya tan BSF post 300 advertisement a chhuak ve mek bawk tih sawiin, “Hetiang hi thil awm dan dik tak a nih mek avangin CM Pu Lalduhoma’n a mi mal ngen chhuah ang hiala dawt ngialngan a sawi ta mai hi chief minister nihna a tizahawm lo hleah kan ngai a. Mizoram mipui bumna atana thubelhchian dawl lo sawi hi sim nghal turin kan hriattir a ni,” a ti.
Chief minister-in social media kaltlanga a thu post-ah India sipai Agniveer lakna kalpui mek chu Lt. Col Clement Lalhmingthanga, MLA-in a vil reng bakah Sports Minister Lalnghinglova Hmar thahnemngaihna zarah sport quota atangin 12 an tlin thu a tar lan pawh hi politics tenawm tak, hna lak chungchang tihbawrhbanna leh mipui rilru hruai sual tumnaah an ngaih thu MPYCC sr. vice president chuan a sawi.
India sipai laknaah hian state politics a inrawlh thei lo tih sawiin Ngurdingpuia Pachuau chuan, “Minister/CM-te duhsakna leh thahnemngaihpuina, recommend avang hian sipaiah a tlin theih loh. Hetianga minister pakhat hmalakna avanga Mizo thalaite sports quota-a sipaia tling nia chief minister-in a sawi hi thil zahthlak leh dik lo, India Army inkaihhruaina tihhminghliauna a ni. Thu dik lo leh atthlak tak hmanga Mizo mipui min bum tawh lo turin chief minister hi kan chah a ni,” a ti.