Congress MP, Lok Sabha-a Leader of Opposition Rahul Gandhi chuan Bihar-ah Voter Adhikaar Yatra chhunzawm zelin a ni riatna, Pathianni khan Purnew district-ah Rashtriya Janata Dal (RJD) hruaitu, Tejashwi Yadav-a nen motorcycle-in kawng an zawh.
Hruaitu pahnihte hian Special Intensive Revision (SIR) neih duh lohna leh dik lohna puangzara yatra an neihah hian motorcycle hi an khalh a, kawng an zawhnaah anmahni thlawptu tam takin an zui.
Yatra hian Panchmukhi Mandir, Forbesganj Road, Hope Hospital Chowk, Rambagh, Kasba Bazaar leh Zero Mile paltlangin Araria an thleng a, Gandhi leh Yadav bakah CPI (ML) Liberation General Secretary Dipankar Bhattacharya leh Vikassheel Insaan Party dintu, Mukesh Sahani te chuan a huhovin thuthar lakhawmtute an kawm bawk.
Inrinnia Katihar-a hun an hmanah Gandhi-a hian BJP chu mi retheite aw hliahin ‘institution-te bawl kual’ a, ‘chanchinbute pawh a thup vek’ niin a sawi.
Mipui hmaah Congress hruaitu hi a auhla, ‘Vote Chor Gaddi Chhodd’ tia ring takin a au va, “Hei hi in media a ni lo va. Zanin tlaiah TV en ula, hetiang auhla hi in hmu lo vang a, khawiah mah in hmu lo vang, a chhan chu mi retheite aw hi an thup vek a. Heng mite hi inhlawhfa leh lo neitu pungkhawmte an ni a, kan vote hi ruk kan phal lo,” a ti.
Yadav-a pawhin BJP kaihhruai sorkar laipui chu ei ru-ah a puh a. “Heng officer leh ei ru sorkar hian residential certificate leh caste certificate atang ringawt pawhin Rs vaibelchhe 4,000 an la a. BJP mite chuan inthlannaah heng sum hi an hmang leh a, hei vang hian ei rukna hi nasa takin a pung mek zel a ni,” tiin a sawi.
“Ei ruk awm lohna, dan bawhchhiat awm lo sorkar a awm theih nan kan thawk mek zel a ni,” a ti bawk.
Ni 16 chhung awh tur Voter Adhikar Yatra hian km 1,300 chuang zawhin district 20 tuam tur a ni a, eptu party-ten Bihar-a electoral roll SIR neiha dik lo tam tak awm nia an sawi puanna atana an tih niin he thil hi ‘vote rukna’ tiin an sawi a. September 1-ah Patna-ah an khar dawn a ni.
Bihar assembly inthlan hi kumin kum tawpah neih tur a ni a, Election Commission of India (ECI) chuan a hun tak erawh a la puang lo.