SASCI sum Rs vbc 127 senga Prime Minister Ekta Mall sakna tur lung chu Chief Minister Lalduhoma’n Inrinni khan a phum.
Unity Mall tia hriat bawk, PM Ekta Mall hi Aizawl Chawnpui venga sak tur a ni a. A sakna tur sum hi kum 2023-24 SASCI part VI hmanga sorkar laipuiin a ruahman a ni a. Sorkar laipuiin ram chhunga thil siam chhuah leh thlai thar chawi larna tura ‘Make in India’ a kalpui hlawhtlinna tur pakhat niin, One District One Products, Geographical Indication Product leh kutthemthiamte kutchhuak thehlarna leh zawrh chhuahna hmunpui a ni a, Mizoram chhunga district tinin dawr an neih dawn bakah state leh UT te dawr tur 36 nen, a vaiin dawr 47 tal a awm dawn a. Hei bakah hian ei tur lam zawrhna leh food court, restaurant, naupang infiamna hmun te, gaming arcade, meeting hall, movie theatre, retail kiosks leh thil dang tam tak a awm bawk dawn a ni.
Ekta Mall sakna tur lungphum a phum zawha Chawnpui Sports Center-a inkhawm buatsaihah chief minister chuan ram chhunga thil siam chhuahte pho chhuahna hmunpui, international market hawlh phaka an kutchhuakte zawrhna tur a nih thu a sawi a. Sorkar laipuiin Unity Mall sakna tur atan state 27-te hnena sum a pek zat a inang vek lo va, Mizoram hi Rs vbc 127 pek a ni a, heta tang hian Rs vbc 63.5 an dawng tawh tih sawiin, a lung an phum ang a, an sa zui nghal mai dawn tih a sawi.
Lalduhoma chuan Unity Mall hi sak zawh fel vek a nih hunah thalai 220 tan hna thar a siam thei tura ngaih a nih thu a sawi a. Mizote hi pi leh pute atang tawha kutthemthiam thil lama sang tak ni ah se, hnam dangte dehchhuah thil an hmang nasa tawh avangin kutthemthiam thil tam tak chu an thi thaw thang tawh a. Thil siam chhuah lama tan lak a ngaih thu a sawi.
Unity Mall sa tur hian sorkar laipui Ministry of Health & Family Welfare hnuaia Public Sector Undertaking lar tak, HLL Infra Tech Services (HITES) te chu ruat an nih thu sawiin Lalduhoma chuan, “Anni hi hetiang sak lama sulhnu nei tha leh rintlak tak an ni. Tunah hian Aizawl RIPANS pawh saw an sa mek a, Mizoramah an mikhual lo va, kan sik leh sa hre sa an ni. Hman ni lawk khan New Delhi-ah an hotute nen kan inkawm a. Sorkar duh dante chipchiar takin ka lo hrilh a. Hna tha kan duh a, chak taka thawh a, chhawr tangkai vat vat kan duh a, revised estimate ngai lo va thawh zawh ngei tum tur a ni, tiin chiang takin ka hriattir a ni. Project Management Unit ti turin IIFCL te thlan an ni bawk,” a ti.
PM Ekta Mall sakna turah hian nodal department chu toursim department an ni a, a sakna hmun tur hi Printing & Stationery Department ram a ni thin a, GAD kutah a lut a ni a. AMC lam pawhin he project a kal chak theih nan hian special permit te an pe a, P&E Department pawhin a tul apiang tiin, electric bante pawh sawnsak an ni.