Aizawl: India rama sorkar damdawi in tha bik tehnaah primary health centre pahnih – Lungdai PHC leh Rawpuichhip PHC te an tel thar.
India-a sorkar damdawi in tha bik tehna, National Quality Assurance Standards (NQAS)-ah Lungdai PHC leh Rawpuichhip PHC chu an tling thar a, a tehnaah 92.92% leh 84.67% te an hmu a. Mizorama PHC awm zingah NQAS National Certificate hmu hi 31 an awm ta a ni.
Rawpuichhip PHC hi Aspirational Block Programme (ABP) hnuaia target zinga mi niin ABP block pathum (Reiek, Lungsen leh Ngopa) huam chhungah NQAS State Certified hi damdawi in panga awm tawhin, heng zinga pathum hian NQAS National Certification an hmu tawh a ni.
Heti hian Mizoram chhunga sorkar damdawi in 44-te chu NQAS National Certificate nei tawh an ni a. Tunah hian sorkar damdawi in 20-in state level certificate nei mekin national certificate result nghak mek an awm lo a ni.
NQAS certified damdawi inte hi endikna chhawng thum paltlang an ni a, a tawp bera endikna an hmachhawn hi National External Assessment a ni a. Hetah hian 70% an hmuh chuan certified an ni chauh thin a. Certified tawhte hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek that dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, a chhehvel vawnfai kawngah te, environment vawn that kawngah te endik an ni.