Aizawl: Gauhati High Court-a The Juvenile Justice Committee buatsaihin Inrinni khan hmeichhe naupang venhim kawnga hmalak dan tur inrawnkhawmna neih a ni.
Gauhati High Court, Aizawl Bench Conference Hall-a ‘State Level Multi-Stakeholders Consultation on Safeguarding The Girl Child : Towards a Safer and Enabling Environment for Her in India’ tih thupui hmanga inrawnkhawmna hi Social Welfare Minister Lalrinpuii’n a hmanpui a. A ngaih pawimawh leh a vei thin, hmeichhe naupang himna chungchanga hmasawn lehzualna tura inrawnkhawmna hun buatsaih a nih chu lawmawm a tih thu sawiin, “Mizoram chu ziak leh chhiar thiam tamah India ramah kan sang a, kan vengva bawk a hengte vang pawh hian hmeichhe naupangte humhim kawngah India ram hmun dang aiin kan titha zawk ni hian a hriat a ni,” a ti.
Lalrinpuii chuan Mizo khawtlangah hmeichhiate an zalenin an vannei em em a, chutih rual chuan hmasawn zel a la ngai tih sawiin, hmeichhe naupangten an inchhungkhur mai bakah sikulah leh khawtlangah thlamuang taka an awm theih nan venpui reng a tul a, sorkar hmalakna bik tur ni lovin kohhran, khawtlang leh tlawmngai pawl hrang hrangte bakah zirtirtute nen thawhhona tha tak neih chhunzawm zel a pawimawh thu a sawi.
Gauhati High Court judge Justice Michael Zothankhuma pawhin pawhin thu sawiin, India ramin dan chi hrang hrang hmanga hmeichhe naupangte chanvo leh humhimna a siam thu leh an zawm that a pawimawh thu a sawi a. Mizoramah a vawi khatna atana hetiang hun buatsaih a nih chu hmasawnna pawimawh tak a nih thu leh hei hian awmze nei zawka hmeichhe naupangte humhim kawngah hmasawnna a thlen ngei a beisei thu a sawi bawk.
Thutkhawmnaah hian ‘Safeguarding the Girl Child : Towards a Safer and Enabling Environment for Her in India,’ ‘Creating a Safer World – Role of judiciary, Enforcement Agencies & Other Resource Agencies’ tih thupuite sawihona hun hman a ni a. Women & Child Development Department, Health & Family Welfare Department, School Education Department, Mizoram State Commission for Protection of Child Rights (MSCPCR) leh Rural Development & Administration Department ten ruahmanna an neihte an sawi fiah a ni.