Aizawl: Zirtawpni chawhnu dar 3:30 khan Tourism Minister Lalnghinglova Hmar chuan Tuirial Airfield hmun hlui a tlawh a, S&YS Department, National Cadet Corps, Mizoram State Sports Council leh Tourism Department lam aiawhte nen tangkai zawka hman dan tur an thlirho.
Tuirial Airfield-a Tourism department hmun hluite chu hman tangkai dan tur enho a ni a. Mizoram thalaite tana tangkai tak tur NCC Academy din nan hman a nih theih leh theih loh te thlirhoin, ruahmanna siam ngai te an siam a ni.
Tuirial Airfield hmun hlui hi NCC Academy mai ni lo, NCC Air Wing-te tana thlawhtheihna khalh zirna (special flying training) atan hman theih a nih leh nih loh te, tunlai khawvel mamawh drone technology zirna hmuna siam theih a nih leh nih lohte enho a ni a. Infiamna hmunhma atana hman tangkai theih chin a awm leh awm lohte leh Tourism kaihhnawih event lian thlen theihna tura buatsaih dan te an thlirho nghal a ni.
Tuirial Airfield tlawhnaah hian Minister hi C. Lalremsanga, Jt. Director, S&YS Department, Lalrinsanga, Wing Commander (Commanding Officer, 1 Mizo Air Squadron NCC) te bakah Mizoram State Sports Council-a Engineer te leh Tourism Department aiawhten an tawiawm a ni.