Arsenal an che na zel a, an la bazar zo lo. Bayer Leverkusen defender Piero Hincapie lak tumin hma an la chho leh mek niin Sky Sports chuan a tar lang.
Hincapie hian June, 2029 thleng Leverkusen-ah contract a la nei a, club hotute hnenah chhuah a dil tawh thung a, tun nipui bazar inhawn laia chhuah a duh niin The Athletic chuan a tar lang.
Leverkusen hian kum 23 mi hi chelh an duh a, an chelh thei dawn lo a nih erawh chuan release clause € maktaduai 60 tihnun mai an pawi ti lo nia report a ni bawk.
Hincapie hi club lian eng emaw zatin an duh a; mahse, Arsenal pan a duh niin The Athletic chuan a tar lang a, Inrinnia Hoffenheim an hneh loh tum khan mittui nen anmahni tantute a thlah nghe nghe.
PSR-in a phuar theih dawn avangin Arsenal hian an player thenkhat hralh an tum mek bawk a. Jakub Kiwior, Oleksandr Zinchenko, Fabio Vieira leh Reiss Nelson te chu an zuar mek.
Kiwior hi FC Porto-in lak tumin hma an la ve mek a, ani hi an hralh thei a nih chuan Ecuador defender hi an la thei mai dawn nia ngaih a ni.
Hincapie hi ke vei lam hmang thiam a ni a, left centre-back-ah a khel thei a, left-back-ah pawh a khel kual thei bawk.
Kum 2021 nipui lai khan Leverkusen chuan Hincapie hi Argentina club CA Talleres atangin an lei a, kum hnih khat chhung lekin Europe-a defender tha ber zingah a inhlang kai hman.
German Club tan vawi 166 a khel tawh a, Ecuador tan vawi 46 a khel tawh bawk a. Tun season-ah vawi hnih a inlan leh tawh bawk.
Leverkusen hian tun nipuiah hian player an hralh chhuak hnem hle a, Florian Wirtz, Jeremie Frimpong, Amine Adli, Granit Xhaka, leh Jonathan Tah te an theh chhuak tawh a, coach Xabi Alonso pawhin Real Madrid a pansan bawk a ni.