Dampa bial by-election lo awm turah ZPM official candidate atan Vanlalsailova puan a ni.

Thawhtanni chawhmaa ZPM party chhung inkhawmah, ZPM President Lalliansawta’n Dampa bial by-election lo awm tura an party ticket-a ding turin Vanlalsailova ruat a nih thu a puang.

Kum 2023-a MLA inthlanpui neihah khan Dampa bialah ZPM ticket-in Vanlalsailova hi a lo ding tawh a. MNF candidate thi ta, Lalrintluanga Sailo a hneh zo lo a ni.

July 21 khan Dampa bialtu MLA hi a thi a. By-election neih a ngaih avangin inbuatsaihna kalpui tan niin hmalakna kawng hrang hrangah neih a ni a. Election Commission of India-in Dampa bial by-election neih hun tur erawh a la puang lo thung.

Hetihlai hian eptu party, Mizo National Front (MNF) chuan an party candidate tur chu nomination committee-in assembly thutkhawm zawhah a ngaihtuah tur thu an sawi a. Mizoram Pradesh Congress Committee (MPCC) chuan candidate tur an ngaihtuah mek tih sawiin Mizoram BJP pawhin candidate an neih ngei tur thu leh search committee dinin hma lak mek a nih thu an sawi bawk.

Engnge a sawi?

Dampa bial by-election neih tura ZPM official candidate tura puan a nih hnuah Vanlalsailova chuan thu sawiin, “Bialtu zahawm tak, Pu Lalrintluanga Sailo-in min kalsan ta hi ka ui tak zet a, a kalsan tak a chhungte hnenah tawrhpuina ka hlan nawn leh a ni.

“Kum 2023 inthlanpuiah ka tling zo ta lo va, theihtawpa vil zui duh mah ila party headquarters thu chhuak awiha ZPM taka bial vil a rem si lo va, chuti chung chuan kum 2028 inthlan awm leh atan ka inbuatsaih sauh sauh reng tho a ni a. Beisei leh rin aia hmaa inthlan hmachhawn a ngai ta hi a pawi a, Pu Rintluanga’n hmangaih taka a lo enkawl tawh a bial kalsan tak hi, kei pawhin duat leh tha taka enkawl zui thei turin ka tan Pathianin kawng min hawnsakah ka ngai.

“Ruling bial lo ni tawh thin kha, kum khat leh thla riat chhung lek eptu bial kan ni chunga hrehawm kan tihzia kha hre reng ila, ruling bial nih zui theihna hun remchang lo inher chhuak leh ta hi, lungrual taka bial hmangaihna nen min lo thlawp vek turin Dampa bial mipuite pawh ka sawm nghal che u a ni,” tiin, politics leh sorkarah ruling bial nih a hlut thu a sawi.