Aizawl: Mizoram Police IGP H Ramthlengliana hovin nimin khan Central YMA hruaituten ruihhlo do beihpui (Special Drive on Drugs) thlak turin Champhai ramri hrul tlawhchhuak turin an pan.
Mizoram sorkarin ruihhlo do beihpui a thlak turah Myanmar leh India ram inrina |iau lui atanga Mizorama ruihhlo a lo luhna kai khân awmna khua zawng zawngte fang chhuak a, khawtlang hruaitute nena inkawm hona hun buatsaiha hun hman pui turin nimin zing dar 6 khan Mizoram Police IGP, H. Ramthlengliana IPS hovin Central YMA hruaitute chuan Aizawl chhuah sanin Champhai an pan.
Champhaiah tukthuan an ei zawhin Tlangsam khawtlang hruaitute nen, Tlangsam YMA Hall-ah hun an hmang a. Zote Community Hall-ah Zote, Ngur leh Ngur Vengsang khawtlang hruaitute nen in kawm lehin, tlai lamah Bulfek khawtlang hruaitute nen an in kawm leh bawk.
Vawiin lam hian Hnahlan, N. Diltlang, Khuangphah leh Vaikhawtlang khawtlang hruaitute nen inkawm ho leh ang.
Sesih, Lianpui, Leisenzo, Vangchhia, Vaphai, Saikhumphai leh Farkawn khua te fang zelin tunkar hun chhung hian hun an hmang dawn a ni.
Mizoram sorkar ruahman dan chuan ramri hrul khaw tinahte hian Police in dahin, September 2025 atang hian ruihhlo lo lut tur lakah beihpui hi an thlak dawn a ni.
IGP hova ramri tlawhchhuah programme hi Addl. SP Champhai Victor Zothansanga leh a thawhpui ten an lo tawiawm a. Central YMA atangin Asst. Secretary Fabian Lalfakawma, Treasurer Roneihthanga leh Finance Secretary MS Ralte te bakah CEC mi pathum leh Sub Hqtr YMA Champhai hruaitute an tel a ni.