Aizawl: Chief Minister Lalduhoma’n Mizoram State University chu kum 2036 hmaa din fel hman an tum thu a sawi.
Thawhtanni khan Government Aizawl College-in Mualpuia an college campus-a kum 50 tlin lawmna, Foundation Day an lawmna chu a hman pui a. Govt Aizawl College-in campus thar an nei chu a lawmpui tih sawiin, hetih rual hian hmasawn zel turin mamawh tam tak an la neih chu sorkarin a tih theih apiang an tizel dawn tih a sawi.
Chief minister chuan Mizoram State University din tumin hma an la tih sawiin, kum 2036 hmaa lo neih fel hman an tum thu leh, Administrative Building hi Luangmuala sak an tum thu a sawi a. A bul lo tantu tur thawktu pawh an la thuai dawn tih a sawi.
Lunglei Pukpuia Mizoram Engineering College pawh a taka function tir an tum tih sawiin Lalduhoma chuan, “Kum 2026 academic year atanga zirna tan tumin thawktu thar mi 63 kan la dawn a ni. A hmunhma thawm that nan tun hnai khan Rs. nuai 2,541.19 kan sanction bawk,” a ti.
Lalduhoma chuan khawvel huapa mithiam ber ber chherchhuak thin ‘Institute of National Importance’ tia koh an nei a. Heng zinga Mizoramin a neih ve, NIT Mizoram Campus hi Lengpuiah kum 2009 khan sak tan a ni a. Forest clearance nei lova sak a nih avangin kum 2017-ah hna zawng zawng tihtawp a ni a. Rs vbc 20 chuang chawi tura tih an ni zui a. Mizoram tana NIT hlutzia an hriat avangin an sorkar veleh an umzui nghal a. Central lamah an lei chawi tur hi ngaihdam an dil a, Rs vbc 10 chuang an ngaidam a. A bak an pek turte chu an pe vat a, campus sak hna hi chhunzawm theih a ni leh dawn ta tih a sawi.