Aizawl: ZPM party chhung inkhawm nimina neihah Adviset to Chief Minister Lalmuanpuia Punte chuan tlawmngai pawl (NGO) inthlanah ZPM party an inrawlh ve ngai loh thu a sawi.
Lalmuanpuia Punte chuan, “Kalphung thar, mipui sorkar kan din meknaah ZPM chuan NGO hrang hrangte a tha zawnga an hmalakna thlawpa kan thawhpui laiin, an inthlannaah erawh kan inrawlh ngai lo va, ZPM sorkar hnua NGO inthlanna awm tawh, MHIP, MSU leh MJA inthlanaah party leh sorkar a inrawlh lo,” a ti.
Chawlhkar thara MZP inthlan awm turah pawh inrawlhna an nei lo tih sawiin, “Sorkar leh party-in sum pawh kan pe lo. Pawl hruaitu tha tak thlang chhuak turin duhsakna kan hlan a, tute pawh tling se tha taka thawhpui kan tum a, anni pawhin tha taka min thawhpui kan beisei,” a ti bawk.