Indian vice president thlan turah signature lem hmanga inthlan chuh tum pakhat hai chhuah a ni a. Kerala-a mi, Joemon Joseph-a’n chuh tura hming a pek hi hnawl a ni tawh bawk.
Joseph-a hian Lok Sabha leh Rajya Sabha member ni lai vekten mi 22-in inthlan chuh ve tura an rawtna leh an thlawp tih lantir nana MP 22-in signature an pek chu a thehlut a. Heng hming sign hi a lem a lo siam vek tih hmuh chhuah a ni a, an hming a hmansak MP-te hian engmah hriat an nei lo tih hriat chhuah a ni.
Hming a hmansak MP zinga thenkhat chuan Joseph-a’n inthlan chuh a tumna lehkha a thehluh hi an hriatpui reng reng lo tih an saiw tawh.
Vice president inthlan lo awm tura hming pek luh theih hun hi Ningani khan a tawp a, mi 46-in nomination paper 68 an thehlut a. Heng zinga mi 19-in an thehluh 28 chu endik thawh khatnaah hnawl nghal a ni a. A dang mi 27-in 40 an thehluh pawh Zirtawpni khan endik a ni.
Endik a nih hnuah chuhtu pahnih, C P Radhakrishnan leh B Sudarshan Reddy te chiah pawm a ni ta a, anni pahnih hian nomination paper pali ve ve an thehlut a. Radhakrishnan-a hi rorel lai tangrual, NDA-in an candidate niin Reddy hi eptu tangrual, INDIA-in an vawrh chhuah a ni ve thung.
Vice president hi thla hmasaa Jagdish Dhankar-a’n a hrisel lohna chhuanlama bânna a thehluh hnuah a hmun rualin September 9 hian inthlan a ni dawn a, NDA hian a vote theitu tur an ngah zawk avangin a tling tura ngaih a ni.