Supreme Court chuan Zirtawpni khan All India Football Federation (AIFF) leh sumdawnnaa an thawhpui, Football Sports Development Ltd (FSDL) chu an inremna thuthlung ziah, Master Rights Agreement (MRA) chungchanga an buaina chu August 28 hmaa an ching fel turin a hriattir.
AIFF leh FSDL hian a hmain MRA hi an lo ziak tawh a, an inremna hi a tawp teuh tawh hle a. A tawp huna a thar ziah leh chungchangah an inrem thei meuh rih lo a, hei vang hian Indian Super League (ISL) khelh hun tur a hriat theih loh phah a, harsatna lian tak a thleng mek a ni.
Hetiang a nih mek avang hian Supreme Court chuan AIFF leh FSDL te chu an harsatna ching fel vat turin a hriattir a, August 28 hmaa an buaina chin fel dan turah thutlukna siam hman turin a hriattir ta a ni.
ISL club leh player te chuan awm dan tur pawh an hrethiam tawh lo hle a, AIFF leh FSDL te hian August 28 hmaa thutlukna an siam a nih chuan India rama football hmanga inelna sang ber ISL ah club te chuan August 31 hmain player transfer an tih a ngai dawn a, an hmanhmawh tawh.
AIFF aiawhtu senior advocate Ranjit Kumar chuan 2010 a AIFF leh FSDL te thuthlung ziahah chuan FSDL in India ram chhunga football tihhmasawn zawnga hma an lakna leh ISL an huaihawt theihna chu December 8 ah khian a tawp tawh dawn tih a sawi a. September thla atanga ISL buatsaih a nih thin thu sawiin, kum thar March thlaah a tawp thin tih a sawi bawk a. Hetiang a nih avang hian FSDL hun chu May 31 thlenga pawh sei a nih chuan engkim a fel vek theih tur thu a sawi.
Senior advocate Gopal Sankaranarayanan chuan, “FSDL hian contract pawh sei a nih loh chuan kan che zui thei lo ti ngawt thei chu an ni chiah lo,” a ti.
Court chuan FSDL hnenah, “A buaipuitu tur ruat thar thei lo kan ni lo,” tiin an hrilh a. “FSDL hian tawnhriat an nei tha a, an hming pawh a tha hle a, hei vang tak hian AIFF nen pawh an thawk dun thei viau a. AIFF nen hian ngun takin rel dun se, thutlukna siam vat se a tha ber a. August 28 thleng hun kan pe ang,” an ti a ni.
Sankaranarayanan chuan Supreme Court hnenah hian ISL club 13 zinga 11 chuan he buaina ching fel tura a hnena ngenna an theh luh tawh thu a sawi a. Thla hmasa atang khan player tam zawk pawhin hlawh an lak tawh loh thu an thlen tih a sawi bawk.
Kum 11 kal ta atang khan FSDL hi AIFF nen an thawk dun tawh a, FSDL hian sumdawnna lampang an buaipui a, inkhel tihchhuah man te, sponsorship atang tein Rs. vaibelchhe 2,000 vel zet chu an hmu thei a, hei vang hian khawvel hmun hrang hrang atangin ISL pawh an en theih phah a. Hetiang a nih avang hian ISL entu pawh maktaduai eng emaw zat an awm theih phah a ni.