Vietnam chuan Typhoon Kajiki thawk tur avangin a kalkawnga awm mi 5,86,000 chuangte chu hmun hima insaseng turin an hriattir.
Thlipui leh ruah thawk tur hian darkar khata km 166-a chak thli a keng tel mek a, Thawhtanniah khawmual kai tur niin khawchin zirtute chuan an sawi.
An ram lailia Thanh Hoa, Quang Tri, Hue leh Da Nang province-a chengte chu hmun hima insaseng tura tih an ni a. Thlawhna thawk turte pawh thlulhtir niin vaukama lawnglengte pawh hmun himah sawn an ni.
Kajiki hian China-a Hainan a paltlang pawh a, an ram khawchin zirtute chuan ruah mm 320 zet a sur thei niin an sawi.
Kajiki hian Vietnam thliarkar a luh hnuah chuan a chakna a hloh dawn niin an sawi a; mahse, darkar khata km 200-a chak leh ruah mm 300-400 sur thei turin an sawi lawk a. Tuipui pawh metre 2-4 thlengin a phul sang thei dawn niin an sawi bawk.
Thuneitute chuan Kajiki kalna kawnga awmte chu Pathianni zan rei deuh (India-a zan dar 07:30) atang chuan pawna chhuak tawh lo turin an ti a. Harsatna tawkte pui turin sipaite an tir chhuak bawk tih an sawi.
“Thil lo thleng tur hi a hlauhawm hle a, lirthei pawh a him dawn lo va, khualzinte leh sangha manna lawng zawng zawng pawh engmah him a awm thei danw lo a ni,” tiin agriculture & environment ministry-a thuneituten an sawi chu AFP news agency-in a tar lang.
Vietnam Airlines chuan Pathianni leh Thawhtanniah khan ram lailia khawpuia thlawhna 22 thlawk lut leh chhuak tur chu an thulhtir.
Thlipui leh ruah thawk tur hi nikum September thlaa Yagi ang tluk zeta na turin an sawi lawk a, kha typhoon thawkah khan Vietnam-ah ringawt pawh mi 300 thiin an chhehvel ramah pawh an tuar na hle.