Aizawl: MPYCC chuan Dampa bialtu MLA Lalrintluanga thihna avanga inthlan that tur a nih thu sorkar thuneituten an chhuah hmaa ZPM party-in candidate an puang chu pawisak an neih lohzia leh mi dang an zah lohzia an nemnghetah an ngaih thu an sawi.
Nimina thuchhuah an siamah Congress Thalai chuan, kum 2021-a Tuirial bialtu ZPM MLA, Andrew H. Thangliana a boral tum pawhin inthlan that a nih tur thu puan hmain eng party mahin candidate an puang lo va. Heihi MLA te zahawmna leh bial mipui tawrhpuina zahawm taka an ngaih thu an tar lang.
Congress Thalai chuan Andrew H. Thangliana boral avanga inthlan that a nih dawn khan ZPM Leader leh tuna ZPM Chief Minister Lalduhoma’n hetianga bialtu MLA a’n boral hian ralna atan party dang pawhin candidate pawh an siam ngai loh thu uar takin a sawi a. Tunah Dampa bialtu Lalrintluanga Sailo hi ZPM hian ralna tlingah an ngai lo nge, inthlan that a nih tur thuchhuah pawh a awm hmaa ZPM candidate an puang hi a dem takzet tih sawiin, mihring inzah lohna lian takah a ngaih thu an tar lang.
MPYCC chuan, “Pu Rintluanga boral sarhû laia ZPM party-in boruak siama programme hrang hrang an buatsaih leh Assembly House-a amah sunna (Obituary) em pawh hman anih hmaa candidate an puang hi Mizoram mipui dem leh mak tih a hlawh hle a. Hetiang inthlan that tur anih thu sorkar thuneituten an chhuah hmaa candidate an puang ta mai hi ZPM Party-in pawisak an neih lohzia leh midang an zah lohzia an nemnghetah a ngai,” an ti.
Dampa bialtu MLA Lalrintluanga Sailo (65)-in a term hmang zo hman lova July 21, 2025 a a boral chu pawi an tiin, sunna pawh an nei tih an tar lang bawk.