- David Zochhuanmawia (Vida Hrahsel Saza)
Centrally Sponsored Scheme (CSS) hnuaia All Mizoram CSS Employees Co-ordination Committee chuan an lawm lohna thu ngaihtuahin meeting hmanmawh an nei a. Ni 29.8.2025 (Zirtawpni) hma ngei hian Health Department hnuaia ‘Govt. of Mizoram Regularization of Centrally Sponsored Scheme 2024’ hmanga Health Worker Provisional Employees ni 21.8.2025 (Ningani) a mi 31 an dah ngheh takte Order sût leh turin sorkar hnenah an ngen a ni.
CSS hnuaia thawktute hian ZPM sorkarah beiseina sang tak neiin, Chief Minister zahawm tak pawhin a bik takin CSS hnuaia regular la ni lote an dah ngheh thuai tur thu hi a lo hrilh tawh a. Tuna CSS Regularization Scheme 2024 hmanga Provisional Employees mi 31 dah ngheh an ni chu hrethiam lovin sorkar hnenah sût leh turin lehkha an thehlut a nih kha! An beisei ang hmalakna a awm lo anih chuan hmalak chhunzawm an tum thu an sawi bawk a ni.
CSS hnuaia thawkte hi kan sorkar hian a huphurh emaw tih tûr khawpin a ngai pawimawh lo hle a. A bik takin zirtirtu (Education) ah chuan CSS tel lova hna thawh theih loh tam tak a awm tawh zawk niin a lang. CSS hnuaia thawkte hian hlawh an la mumal lo thin hle bawk a. Sorkarin thla hnih emaw, a aia rei emaw pek theih loh chang a nei hial a, a ngaih pawimawh tawk lohzia a lang chiang hle a ni. Ka hriatsual loh chuan CSS hnuaia thawkte hian 6th Pay an la hmang char char niin a lang bawk a. Regular te nen an hnathawh a inang a, an hah dan a thuhmun reng bawk. Tin, an zavaia vawikhata dahngheh theih an nih loh pawhin a tahtawla dah ngheh ngei hi sorkar tih mâkmawh a ni.
He Scheme hnuaia Provisional Employee-te hnawh luh dan zawnga dah ngheh an nih theih nana hmalatu hi tu emaw thiltithei tak chu an ni ngei ang. Thil theih emaw, thil dik emaw pawh lo nise CSS hnuaiah chuan han awm ve phawt se, a hmaa rei tak lo awm tawhte seniority-in han regular hmasa se la, sorkarin kan mamawhna zawnah leh kan mamawhna a san dan azirin a tahtawlin regular dan a zawng chho zel ang a, mamawh loh neih reng thu a awm lova, kan ram mamawh anih chuan tuna sorkar hna regular tam tak la ruakte pawh hi hnawhkhat zel zawk ang i hmiang. Police-ah pawh hnaruak tam tak a la awm thu Home Minister pawhin a sawi dum dum a, hnawhkhah erawh a la ni lo. Sorkar hian hnawh khah dan ngaihtuah se, thalai hna nei lo tam tak tan a va chhawrnahawm dawn em!
Govt. of Mizoram Regularization of Centrally Sponsored Scheme 2024 hi CSS hnuaia thawkte tana duan anih ang ngeia a hnuaia inziak lutte hman tangkai tûr niawm taka lang Provisional Employees ten an chhawr daih hriatthiam har an tih thu CSS hnuaia thawk te’n an lo auchhuahpui tawh a. Kum 2014 a Health Worker an lak lai hian Provisional Employees a la awm lo niin sorkar thuchhuahin a tarlang a, khatih hunlai khan MR skilled-II a lak an ni.
Kum 2021 khan tuna Regularization of Centrally Sponsored Scheme 2024 hmanga regularized takte hi CSS a convert an ni ve chiah bawk niin sorkar sawifiahnaah a lang bawk a. Provisional Employees-te hian PE Regularization Scheme an hmang ve thei lova, chuvangin kan sorkar hrawn mek hian ‘Government of Mizoram Regularization of Centrally Sponsored Scheme (CSS) Employees Scheme 2024’ siam a lo nih tak thu an chhuah bawk. Duhsak bik leh thlei bik neia dan thar siam nia ngaih theih turin thil a lo thleng ta a ni.
Engpawhnise, Provisional Employees-te pawh hetianga sorkar hna nghet an thawk tur hi an lawmpuiawm hle a. Chutih rualin CSS hnuaia thawktu inziak lut tam tak regular inbeisei ve rengte luahlan ang deuha thil a thleng hi a fuh lo lai niin a lang. Sorkar inthlahdah avang emaw, tu emaw duhsakna avanga thil thleng anga lang lai hi thil tha lo tak zawk chu a ni. He thil thleng hi sorkar hian uluk taka ngaihtuahin a rang thei ang berin hma la sela, enfiah ngai enfiahin CSS hnuaia thawkte sorkara an ngheh ve theih dan tûr hi a rang thei ang berin ngaihtuah nise. Buaina leh harsatna a thlen chuan a tuar tur chu naupang zirlaite leh CSS hnuaia inziak lutte hnathawhna sorkar hnain a tuar leh ber dawn tho a ni tih hriain, harsatna a thlen hmaa a chinfel dan ngaihtuah turin sorkar hian theihtawp chhuah se a tha mang e.