LPS Vision Production buatsaih TV Reality Show ngaihhlut hlawh, Mizo Talent-a la tlingte mipuiin an vote theihna hun hawn mekah vote 80,000 chuang a tla tawh a, vote tla tawh chinah Lalrinawma’n a hmu tha rih hle.
Show buatsaihtu, LPS Vision-in an ruahman angin judge palite bakah mipuite chu a pangana an ni a. Top 9-te vote theihna hi LPS YouTube Channel-ah pho chhuah mek a ni a, Nilaini chawhma dar 10:00 thleng vote a thlak theih dawn.
Thawhlehni chawhma thlenga vote 80,000 chuang tla tawhah Nalzawl khaw rawlthar phenglawng tum thiam, Rinawma’n vote a la hmu tha ber a, Kolasib nula lâm thiam ngaihzawn rawn, Lucy Lalthazuali leh magician thian dun, 2MG te chu a hmu tha zual zingah an tel.
Mipui vote hi contestant-te tlin leh tlin loh hriltu pawimawh tak niin Inrinni zana round hmasa intihsiakna result puanah pawh show host Hruaitei chuan Rinawma leh Lucy-i chu mipui vote hmanga intihsiakna sang hmachhawn tura tling leh an nih thu a puang a ni.
Mahindra XUV 3XO Mizo Talent intihsiakna hi Ningani zanah LPS Arena, Falkland, Aizawlah neih leh a ni dawn a. Result puan a ni ang a, a tlingte an intihsiak chhunzawm zui dawn a, a tling tur zat erawh puan a la ni rih lo.
Tarlan tawh thin angin, Mizo Talent-a pakhatna hian Rs. 2,00,000 a dawng ang a, Top 3 zinga mi pahnihin Rs. 50,000 ve ve an dawng ang a, Top 10-a inhlang kai, top 3-a lang pha lote chu Rs. 10,000 theuh pek an ni ang.