Aizawl: PHE Minister Prof. Lalnilawma chuan AMRUT 2.0 hnuaia tuidawt hmanga septic tank atanga chhuak, tui lakkhawma sawngbawl thianghlimna tur kawngpui verh hna thawh mek chu Thawhtanni zan khan a endik.
He project hian Aizawl tlaklam veng pakua – Khatla, Tuikual South, Tuikual North, Dawrpui, Dawrpui Vengthar, Dinthar, Vaivakawn, Kanan leh Chawnpui te huam dawn a. He’ng veng atangte hian leihnuaiah tuidawt hmangin septic tank atanga chhuak tui lakkhawm a, MINECO thlang, WCD building piaha a sawngbawlna hmunpuiah luankhawmtir a ni ang a, ek paih duh tan pawh lirthei hmangin a sawngbawlna hmunpuiah hian paih theiha buatsaih a ni.
PHE Minister Prof Lalnilawma chuan he hna hi veng mipuite dawhtheihna leh puihbawmna tel lo chuan a hlawhtling thei dawn lo tih sawiin, neitu nihna nen he hmasawnna hna hi lo dawngsawng turin a ngen.
Aizawl khawpuiah hian septic tank tui luan fimna tur nei tha lo leh nei lo an thahnem em avangin septic tank leak leh paih ruah ngaih tam avangin, hmun remchang leh him, sawngbawl thianghlimna hmun mamawhna a sang hle tih sawiin, “He project hi hriselna leh faina kawnga hmasawna min thlen thei tur a ni a. Hlawhtling taka thawh zawh thuai a nghahhlelhawm hle a ni,” PHE Minister chuan a ti.